Морь жил гарч буйтай холбоотойгоор Хятадад үйлдвэрлэсэн нэгэн морин чихмэл тоглоом цахим сүлжээнд олны анхаарлыг татаж, богино хугацаанд тренд болоод байна.
Уг чихмэлийг Happy Sisters нэртэй компани үйлдвэрлэсэн бөгөөд анхнаасаа инээмсэглэсэн төрхтэй байхаар төлөвлөгдсөн ч үйлдвэрлэлийн явцад нэг ажилтан амны зураасыг санаандгүйгээр доош харуулж оёсны улмаас гунигтай, ядруу төрхтэй болжээ.
Анх алдаа гэж тооцогдож байсан энэхүү хувилбар нь цахим орчинд хурдацтай тархаж, хэрэглэгчдийн сэтгэл зүйтэй нийцсэн дүр төрх гэж үнэлэгдэх болсон байна. Үүний дараа үйлдвэрлэгчид уг “алдаатай” загварыг зориудаар дахин үйлдвэрлэж эхэлжээ.
Олон хэрэглэгч, ялангуяа хотын завгүй ажилтнууд уг морин чихмэлээр дамжуулан өөрсдийн дотоод мэдрэмж, ядарсан байдлаа илэрхийлж байгаагаа сошиал орчинд хуваалцаж байна.
БНХАУ-д “9-9-6” буюу өглөө 9-өөс орой 9 хүртэл, долоо хоногийн зургаан өдөр ажиллах хөдөлмөрийн хуваарь түгээмэл байдаг нь олон хүнийг сэтгэлзүй, бие махбодын хувьд туйлдуулдаг талаар удаа дараа яригдсаар ирсэн.
