Орчин үед чихэвч өдөр тутмын хэрэглээ болсон ч буруу, хэт их хэрэглээ нь эрүүл мэндэд сөрөг нөлөө үзүүлэх эрсдэлтэйг эмч, мэргэжилтнүүд анхааруулдаг. Тиймээс тэд “60–60-ийн дүрэм”-ийг баримтлахыг зөвлөдөг. Энэ нь дууны хэмжээг 60 хувьд тохируулж, өдөрт 60 минутаас илүүгүй хугацаанд чихэвч хэрэглэхийг хэлнэ. Уг дүрмийг зөрчвөл толгой өвдөх, дотор муухайрах, нойр алдагдах зэрэг зовуурь илрэх магадлал нэмэгддэг байна. Ингээд чихэвчийг удаан хугацаанд хэрэглэхэд хүний биед үзүүлэх сөрөг нөлөөг хүргэе.
Толгой өвдөх
Чихэвчийг удаан хугацаанд зүүхэд чих болон толгойн хэсэгт ердийн бус даралт үүсдэг. Үүний улмаас чихний дотор хэсэг, хуйх орчимд таагүй мэдрэмж төрж, толгой өвдөх шалтгаан болдог. Хэрэглээгээ багасгахгүй бол өвдөлт улам даамжирч болзошгүй.
Чих бөглөрөх
Чихэвч чихний сувгийг хааснаар хулхи хуримтлагдах нөхцөл бүрддэг. Ингэснээр чих бөглөрөх, үрэвсэх, цаашлаад чих хатгуулж өвдөх эрсдэлтэй.
Сонсгол муудах
Судалгаагаар залуус 17 килогерц хүртэлх давтамжтай дууг сонсох чадвартай байх ёстой ч чихэвчийг байнга хэрэглэснээр энэ чадвар алдагдаж байна. Хүн төрөлхтөн анхнаасаа нөхөн төлжихгүй 15 мянган сонсголын эстэй төрдөг бөгөөд эдгээр эс үхжихэд чихэвчний хэт хэрэглээ нөлөөлдөг гэж эрдэмтэд үздэг.
Толгой эргэх
Хэт чанга, удаан хугацаанд дуу сонсох нь тэнцвэрийн мэдрэмжийг алдагдуулж, толгой эргэх, дотор муухайрах шинж илрүүлдэг. Чихэвч нь дотоод мэдрэлийг сэдрээж, зохиомол даралт үүсгэдэгтэй холбоотой.
Чих шуугих, хий юм сонсогдох
Чихэвчийг хэтрүүлэн хэрэглэвэл чимээгүй орчинд ч шуугих, хангинах, исгэрэх мэт дуу сонсогдож эхэлдэг. Энэ зовуурийг бүрэн эмчлэх аргагүй тул хэрэглээгээ багасгах нь хамгийн зөв шийдэл юм.
Арьсны асуудал үүсэх
Ялангуяа том чихэвч тогтмол зүүдэг хүмүүсийн чих орчим, нүүрэн дээр нян үржих нөхцөл бүрддэг. Дасгал хөдөлгөөн хийж, хөлс гаргасан үед чихэвч зүүвэл батга, арьсны халдвар үүсэх эрсдэл нэмэгддэг байна.
Зөв хэрэглээ – эрүүл сонсголын үндэс гэдгийг мартахгүй байхыг мэргэжилтнүүд зөвлөж байна.
