Дуучин G-Dragon болон Stray Kids нар Францын нэр хүндтэй буяны арга хэмжээнд хамтдаа оролцохоор болжээ.
Тэд 2026 оны нэгдүгээр сарын 22-нд Парис хотын La Defense Arena-д зохион байгуулагдах “Le Gala des Pièces Jaunes” буюу “Шар зоосны гала” тоглолтын тайзнаа уран бүтээлээ толилуулах юм.
Энэхүү гала тоглолтыг Францын тэргүүн хатагтай Брижит Макроны ивээл дор үйл ажиллагаа явуулдаг Fondation des Hôpitaux сан уламжлал болгон зохион байгуулдаг. Тус сан нь эмнэлэгт хэвтэн эмчлүүлж буй хүүхэд, өсвөр үеийнхний амьдрах орчин, сэтгэлзүйн дэмжлэгийг сайжруулах зорилгоор 1989 оноос хойш “Шар зоос” хандивын аяныг хэрэгжүүлж ирсэн түүхтэй.
2023 оноос эхлэн энэхүү санаачилгыг олон улсын хэмжээний хөгжмийн тоглолтоор өргөжүүлж, дэлхийн шилдэг уран бүтээлчдийг оролцуулан тасалбарын орлогоор хандив цуглуулах болсон нь онцлог. Ирэх жилийн гала тоглолтод К-попын оддоос гадна дэлхийн поп хөгжмийн томоохон төлөөлөгчид болох Кристина Агилера болон A$AP Rocky нар мөн оролцохоор төлөвлөгдөжээ.
