Орчин үеийн хүмүүсийн өдөр тутмын амьдрал дэлгэцтэй салшгүй холбоотой болсон. Ажил, хичээл, мэдээлэл, амралт, чөлөөт цаг гээд бидний ихэнх цаг компьютер, гар утас, таблетын өмнө өнгөрч байна. Гэвч дэлгэцийн хэрэглээ нэмэгдэхийн хэрээр нүд хуурайших, ядрах, улмаар хараа аажмаар муудах эрсдэл нэмэгддэг. Сайн мэдээ гэвэл энэ эрсдэлийг бууруулахад туслах энгийн дадлууд бий.
Анивчихаа мартдаггүй байх
Дэлгэц рүү удаан ширтэх үед хүний анивчих давтамж хэвийн үеэс хэд дахин багасдаг. Үүний улмаас нүдний гадаргуу хангалттай чийгшиж чадалгүй, хуурайшиж, хорсох мэдрэмж төрдөг. Иймээс ажиллаж байхдаа санаатайгаар ч болов ойр ойрхон нүдээ анивчиж хэвших нь нүдийг хамгаалах хамгийн энгийн атлаа үр дүнтэй арга юм.
Текстийн хэмжээг тохируулах
Жижиг хэмжээтэй бичвэр унших нь нүдийг ихэд ядрааж, хүнийг өөрийн мэдэлгүй дэлгэц рүү ойртоход хүргэдэг. Ингэснээр нүдний булчинд илүү ачаалал үүснэ. Тиймээс утас, компьютер дээрх текстийн хэмжээг томруулж, уншихад хялбар болгож тохируулах нь нүдний ядаргааг багасгахад тустай.
20–20–20 дүрмийг хэвшүүлэх
Нүдний эрүүл мэндийг хамгаалахад хамгийн их зөвлөдөг аргуудын нэг бол 20–20–20 дүрэм юм. Өөрөөр хэлбэл, 20 минут тутамд дэлгэцнээс харцаа салгаж, 20 фут буюу ойролцоогоор 6 метрийн зайд байгаа зүйл рүү 20 секунд харах хэрэгтэй. Дэлгэц рүү удаан ширтэхэд нүдний булчин нэг л фокус дээр “ажилласаар” байдаг бол энэ дасгал нь булчинг суллаж, фокусыг сэргээх ач холбогдолтой.
Цэнхэр туяаны нөлөөг багасгах
Дэлгэцээс ялгардаг хөх туяа нь нүдийг хурдан ядраах, зарим тохиолдолд нойрны хэмнэлийг алдагдуулах эрсдэлтэй. Ажлын онцлогоос шалтгаалан дэлгэцээс бүрэн холдох боломжгүй байж болох ч завсарлага авах, уулзалтыг дэлгэцгүйгээр хийх, цаасан дээр гүйцэтгэх ажлууд төлөвлөх зэрэг нь хөх туяаны нөлөөг багасгахад тусална.
Нүдний хараа муудах нь гэнэт биш, аажмаар үүсдэг асуудал. Харин анивчих, текстийн хэмжээг тохируулах, 20–20–20 дүрмийг мөрдөх, дэлгэцийн хэрэглээг ухаалгаар зохицуулах зэрэг жижиг дадлуудыг өдөр тутамдаа хэвшүүлснээр нүдний ядралтыг багасгаж, хараагаа урт хугацаанд хамгаалах бүрэн боломжтой. Нүд бол нэг удаа алдагдвал нөхөн сэргээхэд хэцүү эрхтэн учраас өнөөдрөөс эхлэн анхаарал тавих нь хамгийн зөв хөрөнгө оруулалт юм.
