Аж үйлдвэр эрдэс баялгийн яамнаас шатахууны нийлүүлэлтийг хэвийн байгаа талаар мэдээллээ. Тус яамны Төрийн нарийн бичгийн дарга Б.Дашпүрэвийн өгсөн мэдээллээр, манай улс арваннэгдүгээр сард 69 мянган тонн АИ-92 авто бензинийг гэрээний хүрээнд захиалжээ. Үүнээс 40 мянган тонныг худалдан авсан бөгөөд үлдсэн арав хоногийн хугацаанд 30 мянган тонныг импортлох аж.
Өнөөдрийн байдлаар шатахууны нийлүүлэлтийг хэвийн, найдвартай байгааг тэрбээр яриандаа онцолж “ОХУ-аас тээвэрлэлтээ сайжруулж хангалтаа хэвийн явуулна. Гэрээ баталгаажсан. Энэ хүрээнд захиалгын дагуу бүтээгдэхүүнээ авч байгаа учир арав хоногийн хугацаанд 30 мянган тонн бүтээгдэхүүн орж ирнэ. Энэ нь шатахууны хэвийн байдлыг хангана гэсэн үг юм” гэлээ.
Ерөнхий сайд Г.Занданшатар, Аж үйлдвэр эрдэс баялгийн сайд Г.Дамдинням тэргүүтэй ОХУ-д энэ сарын 17-18-нд хийсэн айлчлалын хүрээнд тус улсаас Монгол Улсад шатахууны нийлүүлэлтийг эрс нэмэгдүүлэхээр тохиролцсон билээ. Тодруулбал, ОХУ-ын Засгийн газрын дарга М.В.Мишустинтэй хийсэн уулзалтаар, тус улс нь автобензиний экспортдоо тодорхой хязгаарлалт хийж буй ч энэ нь Монгол Улсад хамаарахгүй, нийлүүлэлт тогтвортой үргэлжилж, газрын тосны бүтээгдэхүүний нийлүүлэлтийн хэмжээг нэмэгдүүлэхээр болсон юм.
