Netflix-ийн хамгийн өндөр хандалттай нэвтрүүлгүүдийн нэг болоод буй Physical: Asia шоунд Өмнөд Солонгосын баг түрүүлсэн нь олон улсын үзэгчдийн дунд тодорхой хэмжээний шүүмжлэл, хэлэлцүүлэг үүсгэсэн талаар International Business Times UK, MK News, ZAPZEE зэрэг хэвлэлүүд мэдээлжээ.
IB Times UK-ийн мэдээлснээр зарим үзэгчид сорилтын шат, дүрэм, талбайн бүтэц нь “Солонгосын багт илүү тохирсон мэт” харагдсан гэж бичсэн бөгөөд “сорилтуудыг урьдчилан мэдсэн мэт санагдсан”, “дүрэм тодорхой бус байсан” гэх сэтгэгдэл ч гарсан байна. Гэхдээ эдгээр нь батлагдсан баримт бус, зөвхөн үзэгчдийн ажиглалт, сэтгэгдэлд суурилсан гэдгийг нийтлэл онцолсон байна.
MK News-ийн тайлбарласнаар, Солонгосын багийн бүрэлдэхүүнд өмнөх улирлын Physical 100 зэрэг том тэмцээнүүдэд амжилт гаргасан шилдэг тамирчид байсан. Эдгээр хүчтэй тамирчид багтсан нь үзэгчдэд “давуу байсан мэт” ойлголт төрүүлэх нэг суурь болсон гэжээ.
Гэсэн хэдий ч IB Times UK “Өмнөд Солонгосын багийн ялалтын үр дүнг зориудаар өөрчилсөн, эсвэл шоуг зохион байгуулагчдын зүгээс ямар нэгэн будилаан гарсан” гэх баттай нотолгоо одоогоор байхгүй гэдгийг тодорхой дурдсан бөгөөд цахим орчинд өрнөж буй шүүмжлэлүүд нь албан ёсоор тогтоогдсон асуудал бус харин үзэгчдийн сэтгэгдэл гэдгийг онцлоод буй.
