Монгол Улсын Шадар сайд, УОК-ын дарга С.Амарсайхан Швейцарын Хөгжлийн агентлагийн дарга, Ерөнхий консул Стефани Бурриг өөрийнх нь хүсэлтээр хүлээн авч уулзлаа.
Уулзалтаар Швейцарын Холбооны Улсын Засгийн газраас Монгол Улсад тохиолдоод буй цаг агаарын нөхцөл байдал, хаваржилтын хүндрэлийг даван туулахад дэмжлэг үзүүлэх үүднээс 250 мянган ам.доллартой тэнцэх хэмжээний тусламж үзүүлэхээр болсон тухай Шадар сайдад танилцуулсан юм.
Мөн Швейцарын Хөгжлийн агентлагаас манай улсын Онцгой байдлын гал сөнөөгч, аврагч нарыг гамшгаас урьдчилан сэргийлэх, гамшгийн үеийн арга техникийн талаар сургаж буй бөгөөд цаашид ч энэ чиглэлээр хамтын ажиллагаагаа үргэлжлүүлэх, өргөжүүлэх тал дээр санал солилцлоо.
Эх сурвалж: Шадар сайдын ажлын алба
