Манай humanz.mn сайт нь унших дадлыг дэмжих, олон нийтийн мэдлэгт нэмэр болох, уншиж бичих чадварыг хөгжүүлэх зорилгоор алдартай зохиолчдын бичсэн номын онцлох агуулгуудыг хүргэдэг билээ. Энэ удаа бид зохиолч Я.Арслангийн “Эрүүл урт наслах алтан судар” номыг сонголоо. Энэхүү бүтээл нь 2023 онд уншигчдын гарт хүрсэн бөгөөд сонирхолтой олон мэдээллийг багтаажээ. Тус номонд багтсан мэдээллээс уншигч танд хүргэе. Та бүхэн “Эрүүл урт наслах алтан судар” номыг Интерном дэлгүүрээс худалдан авах боломжтой.
Сарын тэмдэг нь эмэгтэйчүүдийн физиологийн онцлогтой уялдсан хэвийн үзэгдэл боловч энэ үед хэрэглэх хоол хүнсийг сонгоход анхаарвал зохих зүйл байдаг.
Нэг. Түүхий, хүйтэн идээ, ундаа хэрэглэхийг цээрлэнэ. Хэрэв үүнийг эс анхаарч ихээр хэрэглэвэл цус бүлэгнэх, зоо нуруугаар өвдөх, сарын тэмдгийн ирэлтийн хугацаа уртсах зэрэг харш нөлөө үзүүлнэ.
Хоёр. Түүхий гаа, сонгины иш, архи, тамхи гэх мэт халуун, гашуун зүйлийг хэрэглэж болохгүй.
Эдгээрийг хэрэглэвэл сарын тэмдгийг нэмэгдүүлж, бие өвдөнө. Энэ үед С витамин ихтэй жимс, ногоо хэрэглэх нь биед тустай байдаг. Зарим эмэгтэйчүүдэд хэт шорвог зүйлийг, тухайлбал, давсалсан мах, ногоо тохиромж муутай байдаг. Харин тэд угтуулж юм уу, сарын тэмдэг ирсэн хугацаанд В6 витамин ихтэй хүнсний зүйл, тухайлбал, мах, өндөгний шар, элэг, шар буурцаг, шинэ ногоо идвэл сайн.
Гурав. Сарын тэмдэг ирэх үеэр зоо нуруугаар өвдөх явдал байдаг. Энэ нь бие организмд магни дутагдалтай холбоотой. Иймд магни ихтэй хүнсний бүтээгдэхүүн буюу овьёос, вандуй, эрдэнэ шиш, арвайн гурилыг хүнсэнд хэрэглэвэл өвдөлтийг зөөлрүүлэх буюу бүр арилгаж чадна.
Цус дутагдахаас сэргийлэхийн тул төмрийн агуулга ихтэй хүнсний зүйлийг түлхүү хэрэглэдэг байна. Элэг, бөөр, буурцагт ургамалд төмөр илүү их байх бөгөөд, дээд гурилын цагаан талханд харьцангуй бага байдаг. Төмрийн шингэцийг бууруулдаг бодис цайнд байдгийг бас анхааралдаа авч энэ үеэр цай бага хэрэглэх юм уу, эсвэл төмрийн агуулга ихтэй хүнсний зүйлээс нэлээд хэдэн цагийн зайтай хэрэглэх нь зүйтэй.
Эх сурвалж: “Эрүүл урт наслах алтан судар” ном
