Нийслэлийн ерөнхий боловсролын 2, 113, 146, Эрдмийн өргөө сургуулиудын үйл ажиллагаатай танилцаж, “Тэгш хамруулах боловсрол”-ын арга зүйн дэмжлэг үзүүлэх, зөвлөн туслах үйл ажиллагааг Боловсролын ерөнхий газрын Тэгш хамруулах боловсролын хэлтсийн дарга болон мэргэжилтнүүд 2025 оны 11 дүгээр сарын 11-13-ны өдрүүдэд зохион байгууллаа.
Зөвлөн туслах үйл ажиллагааны хүрээнд:
Ялгаатай хэрэгцээтэй суралцагч боловсрол эзэмшихэд ашиглах ном, гарын авлага, сургалтын хэрэглэгдэхүүн, сургалтын орчин, нөхцөл, туслах хэрэгсэл, тоног төхөөрөмжийг хүртээмжтэй хэлбэрээр бүрдүүлсэн эсэх, хүүхдийн хөгжлийг дэмжих танхимын үйл ажиллагаатай танилцах;
Суралцагчийн ялгаатай хэрэгцээ, онцлогийг харгалзан, дэмжлэг үзүүлэн ажиллах чиглэлийг сургалтын үйл ажиллагаандаа тусган хэрэгжүүлж буй эсэх;
Сургалтын хөтөлбөрийн хэрэгжилт болон ганцаарчилсан сургалтын төлөвлөгөөтэй танилцаж, ялгаатай хэрэгцээтэй суралцагчдад боловсрол эзэмшихэд тулгарч буй асуудал, бэрхшээлийг судлах;
Ялгаатай хэрэгцээтэй суралцагчид шаардлагатай тохирох хэрэглэгдэхүүн, төсөв санхүүжилт, зардал болон тус суралцагчтай ажиллаж байгаа багш, багшийн туслахын нэмэгдэл хөлс олгож буй талаар нөхцөл байдалтай танилцах;
Багш ажилчдыг тэгш хамруулах боловсрол, ялгаатай хэрэгцээтэй хүүхэдтэй ажиллах арга зүйн мэдлэг, эерэг ойлголт, хандлагыг нэмэгдүүлэх чиглэлээр сургалт, зөвлөгөө, мэдээлэл өгч ажиллалаа.
СУРГАЛТААР:
Тэгш хамруулах боловсролын хууль эрх зүйн орчин, хэрэгжилтэд анхаарах асуудал
Дэмжлэгийн багийн төлөвлөгөө,үйл ажиллагааг хэрэгжүүлэхэд анхаарах асуудал
Ганцаарчилсан сургалтын төлөвлөгөө, боловсруулах хэрэгжүүлэхэд анхаарах асуудал сэдвийн хүрээнд сургалт зохион байгуулж, тус сургуулиудын удирдлага, багш нар хамрагдлаа.
Зөвлөн туслах үйл ажиллагаанд хамрагдсан нийт 4 сургуульд Хөгжлийн бэрхшээлтэй 129 суралцагч суралцаж байгаа бөгөөд Ганцаарчилсан сургалтын төлөвлөгөөгөөр 95 суралцагч буюу 1-5-р ангид 71, 6-9-р ангид 20, 10-12-р ангид 4 суралцагч хичээллэж байна.
Сүхбаатар дүүрэг:
2 дугаар сургууль нь хүүхдийн хөгжлийг дэмжих танхимын тохижилт болон тухайн танхимын орчны тохируулгат анхааран ажилласан;
Баянгол дүүрэг:
113 дугаар сургууль нь багшийн туслахыг ажиллуулсан;.
146-р сургууль нь хүүхдийн хөгжлийг дэмжих танхимдаа тусгай хэрэгцээт боловсролын багшийг ажиллуулж, багш нартаа арга зүйн дэмжлэг үзүүлсэн;
Эрдмийн өргөө сургууль нь үе тэнгийнхний дунд сайн дурын нөлөөллийн ажлыг санаачилсан, ялгаатай хэрэгцээтэй суралцагчийн бүтээлээр үзэсгэлэн гаргасан зэрэг ажлуудыг хийж, хэрэгжүүлж байна.