Поп дуучин Дуа Липа, Coldplay хамтлагийнхан зэрэг 40 гаруй уран бүтээлч Их Британийн Ерөнхий сайд Сир Кэйр Стармерт хамтарсан захидал илгээж, тасалбарын дамлан худалдаа буюу “scalping”-ийг хязгаарлах амлалтаа яаралтай биелүүлэхийг уриаллаа.
Их Британийн Засгийн газар энэ оны нэгдүгээр сард фенүүдийн гаргасан гомдлын дараа тасалбарын дам борлуулалтыг зохицуулах санал асуулга явуулсан ч долоон сарын турш бодит шийдвэр гараагүй байна.
“Which?” байгууллагын судалгаагаар Oasis хамтлагийн Wembley цэнгэлдэх дэх тоглолтын тасалбарууд 4,442 фунт стерлинг хүртэл үнээр дахин зарагдсан нь дам худалдааны хэтийдсэн хэмжээг харуулжээ. Өрсөлдөөний ба Зах зээлийн газраас (CMA) үзэхэд дахин борлуулж буй тасалбарууд анхны үнээс дунджаар 50%-иар илүү үнээр худалдаалагддаг байна.
Засгийн газар санал асуулгад үндэслэн тасалбарын дахин борлуулалтын үнийг хамгийн ихдээ 30%-иар нэмэхийг зөвшөөрөх хувилбар дэвшүүлсэн ч хэрэгжээгүй хэвээр байна.
Үүнтэй зэрэгцэн “Which?” болон BBC-ийн мөрдөн шалгалтаар Бразил, Дубай, Сингапур, Испани, АНУ зэрэг улсаас ирсэн “мэргэжлийн” дам худалдаачид алдартай тоглолтын тасалбарыг бөөндөж авч, StubHub, Viagogo зэрэг платформоор асар өндөр үнээр дахин зарж байгааг тогтоосон байна.