Японы Акита муж энэ жил улс даяар бүртгэгдсэн баавгайн халдлагын гол төв болж байна. Засгийн газрын мэдээллээр 2024 оны дөрөвдүгээр сараас хойш 13 хүн амь насаа алдаж, 100 гаруй иргэн шархадсан нь 2006 оноос хойших хамгийн өндөр үзүүлэлт юм.
Акитагийн амбан захирагч Кэнта Сузүки “нөхцөл байдал орон нутаг ба мужийн түвшинд зохицуулах боломжгүй болсон” хэмээн мэдэгдэж, асуудлыг цаг уурын өөрчлөлт ба амьдрах орчны доройтлоос үүссэн үндэсний хэмжээний хямрал гэж тодорхойлжээ.
Орон нутгийн удирдлагууд Японы Өөрийгөө хамгаалах хүчнээс тусламж хүсэж, “торон урхи, үнэрт бодис” зэрэг сургалт хангалтгүй байгааг дурдсан. Гэвч цэргүүд агнах эрхгүй, зөвхөн анчдын агнасан амьтдыг тээвэрлэх, логистикийн дэмжлэг үзүүлэх үүрэгтэй.
Батлан хамгаалахын сайд Шинжиро Коидзуми “орон нутгийн нөөц барагдаж байна. Захирагчдын хүсэлтэд хэрхэн хариу өгөхийг бодолцох шаардлагатай” гэж хэлжээ. Үүнтэй зэрэгцэн Үндэсний цагдаагийн агентлаг Акита, Иватэ мужийн орон сууцны бүсэд цагдаа нар баавгай буудах эрх олгосон шийдвэр гаргасан бөгөөд орон нутгийн удирдлагууд хиймэл оюун дээр суурилсан технологийн шийдлүүдийг туршиж эхэлжээ.
Гифү мужид нохой хуцаж, салютын дуу гаргадаг дронууд баавгайг айлгах зорилгоор ашиглаж байгаа бол зарим бүсэд хиймэл оюун бүхий хяналтын камеруудыг суурилуулжээ. Гэвч иргэдийн айдас намжаагүй бөгөөд, намрын сэрүүн улиралд аялал жуулчлал эрс буурав. Зарим хотууд иргэдэд “хоол хүнсээ ил орхихгүй байх” тухай сэрэмжлүүлэг тарааж байна.
Судлаачдын үзэж байгаагаар цаг уурын өөрчлөлт, байгалийн урсгал доройтсоноос баавгай идэш тэжээлээ олохоор хүн амьдрах бүсэд орж ирж байна. Байгаль орчны яамны мэдээлснээр царс модны самрын ургац муу байсан нь баавгайг орон сууцны бүсэд нүүдэллэх гол шалтгаан болжээ.
Нөгөө талд хөдөө тосгонд хүн ам цөөрч, газар эзэнгүйдсэнээс ургамал бут хэт ургаж, баавгай хот суурин руу нэвтрэхэд илүү амар болжээ.
Акитагийн амбан захирагч Сузүки “Өнгөрсөн жилийн энэ үеэс халдлагууд буурч байсан. Бид энэ намрын оргил үеийг давж гарахын төлөө бүх нөөцөө дайчилна” хэмээн мэдэгдсэн байна.
