Зургаан жилийн өмнө Абигэйл Спанбергер болон Майки Шеррил нар АНУ-ын Конгрессын анхны жилдээ хамт байр түрээслэн амьдарч байсан “өрөөний найзууд” байв. Тэд тухайн үед Ардчилсан намын төлөөллөөр Конгресст сонгогдож, Төлөөлөгчдийн танхимыг буцаан авахад чухал үүрэг гүйцэтгэсэн билээ.
Харин энэ долоо хоногийн мягмар гарагт тэд дахин түүх бүтээв. CNN-ийн мэдээлснээр, Абигэйл Спанбергер Виржини мужийн анхны эмэгтэй захирагч, харин Майки Шеррил Нью Жерсигийн Ардчилсан намын анхны эмэгтэй захирагч боллоо. Тэдний ялалт нь Ардчилсан нам дотор “дараагийн удирдагч хэн байх ёстой вэ?” гэсэн маргаан ширүүсч буй үед тохиож байна. Түүнчлэн сонгогчдын итгэлийг хэрхэн буцаан олж авах вэ гэсэн асуудалд тодорхой хариулт өгч байна.
Хоёр эмэгтэй амьжиргааны өртөг, эрүүл мэндийн үйлчилгээ, орон сууц, эрчим хүчний зардлыг бууруулах амлалтаа гол уриа болгон өрсөлдсөн нь сонгогчдод хүчтэй хүрсэн бололтой. Урьдчилсан дүнгээр тэд 2021 оны өмнөх захирагчдынхаа авч байсан нийт саналын тоог давжээ. “Өнөө орой бид дэлхий даяар мессеж илгээлээ. 2025 онд Виржини муж улс талцал бус прагматизмыг сонгосон” гэж Спанбергер ялалтын үдэш хэлсэн байна.
Спанбергер нь Тагнуулын төв газрын (CIA) хуучин ажилтан, харин Шеррил нь АНУ-ын Тэнгисийн цэргийн нисдэг тэрэгний нисгэгч байсан. Тэд хоёул 2018 онд Бүгд Найрамдахчуудын мэдэлд байсан тойргуудаас ялалт байгуулж, үндэсний аюулгүй байдлыг чухалчилсан төв үзэлтэй улс төрчид хэмээн тодорхойлогдож байв.
Одоо тэд Ардчилсан намын захирагчдын холбооны (Democratic Governors Association) хамгийн сүүлийн үеийн хоёр гишүүн болж, улс төрийн замналаа зэрэг эхлүүлж байна. Спанбергер кампанит ажлынхаа үеэр хамт өрсөлдөж буй найзтайгаа туршлага солилцох нь “сонирхолтой” байсан гэж хэлжээ. “Бид тэмдэглэлээ хуваалцаж, туршлагаа харьцуулах нь хөгжилтэй байсан. Гэхдээ надад хамгийн их сэтгэгдэл төрүүлсэн зүйл бол тэр үнэхээр хөдөлмөрч хүн. Бид ижил зорилго руу өөр замаар хүрдэг, энэ нь бодит үнэ цэнэ авчирдаг” гэж тэр CNN-д ярьжээ.
Тэрээр мөн найзынхаа талаар, “Би түүний кампанит ажлын талаар мэднэ. Тэр Нью Жерсигийн өнцөг булан бүрээр аялж байгаа. Бидний нийтлэг зүйл бол иргэдийн дуу хоолой, бодит асуудалд анхаарч байгаа маань” хэмээн нэмж хэлэв.
CNN news
