Их Британийн хаан Чарльз дүү болох Эндрүүгийн хунтайжийн цол болон Виндзорын ордны ойролцоо орших харшийг нь хураах шийдвэр гаргасан тухай Букингемийн ордноос пүрэв гарагт мэдэгдлээ. Энэ нь түүнийг бэлгийн гэмт хэрэгтэн агсан Жеффри Эпштейнтэй холбоотой дуулианд нэр холбогдсон асуудлын хариуд авч буй хатуу арга хэмжээ юм.
65 настай Эндрүү нь хатан хаан агсан Элизабет II-ын хоёр дахь хүү, хаан Чарльзын бага дүү бөгөөд сүүлийн жилүүдэд Эпштейнтэй харилцаа холбоо болон хувийн зан байдлаасаа шалтгаалан олон нийтийн болон хэвлэл мэдээллийн дарамтад өртөж иржээ. Энэ сарын эхээр түүнийг Йоркийн гүнгийн цол (Duke of York)-оос нь чөлөөлсөн бол хаан Чарльз одоо үүнээс нэг алхам цаашилж, бүх язгууртны хэргэм цолыг нь хураан, цаашид түүнийг Эндрүү Маунтбаттен-Виндзор нэрээр дуудах болно гэж мэдэгджээ.
Ордны мэдэгдэлд дурдсанаар, Эндрүү Виндзорын эзэмшил дэх “Royal Lodge” харшийн түрээсийн эрхээ албан ёсоор буцаан өгөх тухай мэдэгдэл хүргүүлсэн бөгөөд тэрээр зүүн Английн хувийн орон сууц руу нүүх юм байна.
“Тэрээр эсэргүүцлээ үргэлжлүүлж байгаа ч, уг шийтгэл нь зайлшгүй хэмээн үзсэн,” гэж мэдэгдэлд дурджээ. “Тэдний Величнүүд аливаа хүчирхийлэл, зүй бус үйлдлийн хохирогч, амьд үлдэгсдийн талд байсаар ирсэн бөгөөд тэдэнд гүн эмгэнэл илэрхийлж байна.”
Ордны эх сурвалжийн мэдээлснээр, Эндрүү буруутгалыг үгүйсгэсээр байгаа ч “үнэлж баршгүй алдаа гаргасан нь тодорхой” хэмээн хаан дүгнэсэн байна. Хаан Чарльз энэ шийдвэрийг бие даан гаргасан боловч уг шийдвэрийг гэр бүлийн бусад гишүүд, тэр дундаа угсаа залгамжлагч хунтайж Уильям дэмжжээ.
Сүүлийн долоо хоногт Британи дахь хэвлэлүүд Эндрүүгийн санхүүгийн байдал болон 30 өрөөтэй Royal Lodge ордондоо 20 жил түрээс төлөөгүй гэх мэдээллийг онцолж байна. The Times сонины мэдээлснээр, тэрбээр ордонд нүүж ирэхдээ 7.5 сая фунт стерлинг (ойролцоогоор 10 сая ам.доллар)-ийн засвар хийсэн ч түрээсийн төлбөр төлөөгүй аж.
Түүнчлэн, Британийн парламентын нэгэн хорооны гишүүд өнгөрсөн лхагва гарагт “Эндрүү одоог хүртэл тэр харшид амьдрах ёстой юу” гэсэн асуулт тавьж, төрийн өмчийн орон сууц ашиглалтын асуудалд улс төрийн түвшинд анхаарал хандуулж эхэлжээ.
Ийнхүү Хаан Чарльзын шийдвэр нь хааны гэр бүлийн нэр хүндийг сэргээх зорилготой хамгийн том алхамуудын нэг болж байна.
Эх сурвалж: ABC news
