Air India компанийн гол хувьцаа эзэмшигчид болох Сингапурын агаарын тээврийн компани (Singapore Airlines) болон Tata Sons-оос тус компани дор хаяж 100 тэрбум рупи (ойролцоогоор 1.14 тэрбум ам.доллар)-ын санхүүгийн тусламж хүсэж буй талаар Bloomberg News мэдээллээ.
Энэхүү алхам нь зургадугаар сард болсон аймшигт ослын дараа гарч байгаа бөгөөд уг ослын үеэр 240 гаруй зорчигч амиа алдсан нь тус компанийн түүхэн дэх хамгийн хүнд хямралын нэг болж, нэр хүндээ сэргээх болон нисэх онгоцны паркаа шинэчлэх төлөвлөгөөг хүндрүүлжээ.
Тайлангийн дагуу, Air India нь тусламжийн хөрөнгийг систем, үйлчилгээний шинэчлэл болон инженер, засвар үйлчилгээний дотоод хэлтсийг хөгжүүлэхэд ашиглахаар төлөвлөж байгаа аж.
Bloomberg-ийн мэдээлснээр, санхүүгийн дэмжлэгийг хувь эзэмшлийн хэмжээнд харьцуулан хуваарилах бөгөөд тус хөрөнгийг хүүгүй зээл хэлбэрээр эсвэл хувьцааны хөрөнгө оруулалт хэлбэрээр олгох эсэхийг эзэмшигчид шийдвэрлэх юм байна.
Tata Group 2022 онд Air India-г худалдан авч, одоогоор компанийн 74.9 хувийг, харин Singapore Airlines үлдсэн 25.1 хувийг эзэмшдэг.
Сингапурын агаарын тээврийн компанийн төлөөлөгч “Air India-гийн шинэчлэлийн хөтөлбөрийг дэмжих хүрээнд бид Tata Sons-той нягт хамтран ажиллаж, мэргэжлийн зөвлөгөө болон дэмжлэг үзүүлж байна” хэмээн Reuters-т илгээсэн цахим мэдэгдэлдээ дурджээ.
Reuters уг мэдээллийг бие даан баталгаажуулж чадаагүй бөгөөд Air India болон Tata Sons компаниуд тайлбар өгөөгүй байна.
Энэ долоо хоногийн эхээр Air India-гийн гүйцэтгэх захирал компанийн дотоод үйл ажиллагааг сайжруулах, аюулгүй байдлыг бэхжүүлэх чиглэлд илүү хатуу арга хэмжээ авах болно гэж мэдэгдсэн юм.
Эх сурвалж: Reuters.com
