ОХУ цөмийн хөдөлгүүртэй “Буревестник” крүүз пуужингийн туршилтыг амжилттай гүйцэтгэсэн талаар Ерөнхийлөгч Владимир Путин ням гарагт мэдэгдлээ. Москвагийн мэдээлснээр энэхүү зэвсэг нь ямар ч пуужингийн эсрэг хамгаалалтыг нэвтрэх чадвартай бөгөөд ОХУ уг зэвсгийг ашиглалтад нэвтрүүлэхээр төлөвлөж байна.
ОХУ-ын Зэвсэгт хүчний Ерөнхий штабын дарга Валерий Герасимовын мэдээлснээр, уг пуужин аравдугаар сарын 21-нд хийгдсэн туршилтын үеэр 14,000 км зайг туулж, 15 цаг орчим агаарт байжээ. “9М730 Буревестник” буюу НАТО-гийн ангиллаар SSC-X-9 “Skyfall” хэмээн нэрлэгдсэн энэхүү зэвсэг нь одоо болон ирээдүйд ашиглагдах ямар ч пуужингийн хамгаалалтыг даван гарах чадвартай, бараг хязгааргүй нислэгийн хүрээтэй, урьдчилан таамаглахын аргагүй нислэгийн замтай гэж ОХУ мэдэгдэв.
Путин, Украины дайныг удирдан хянаж буй генерал нартай уулзах үеэрээ цэргийн хувцастай сууж, “Манай энэ зэвсэг бол дэлхийд дүйцэх зүйлгүй, өвөрмөц бүтээл” хэмээн онцолсон байна.
Тэрбээр өмнө нь зарим орос мэргэжилтнүүд энэхүү зэвсэг бодит ажил хэрэг болох боломжгүй гэж үзэж байсан ч “гол туршилт амжилттай хийгдсэн” гэж мэдэгдэв. Путин, Герасимовт хандан “Буревестник”-ийг ангилах, ашиглалтад бэлтгэх дэд бүтцийг байгуулах шаардлагатайг дурдсан байна.
Герасимовын хэлснээр, уг пуужин цөмийн хөдөлгүүрээр ажиллаж, урт хугацаанд ниссэн нь өмнөх туршилтуудаас онцлог байжээ. Тэрээр “энэ зэвсэг ямар ч пуужингийн эсрэг хамгаалалтыг сөрөх чадвартай” гэж онцолсон байна.
Өнгөрсөн долоо хоногийн лхагва гарагт Путин ОХУ-ын стратегийн цөмийн хүчний хуурай зам, тэнгис, агаарын хүчний хамтарсан сургуулилтыг удирдан, бэлэн байдлыг шалгажээ
“Манай цөмийн саатуулах хүчний орчин үеийн түвшин дэлхийд хамгийн өндөр түвшинд байна” гэж Путин мэдэгджээ.
АНУ ба ОХУ хамтдаа дэлхийн цөмийн зэвсгийн нийт нөөцийн 87 хувийг эзэлдэг бөгөөд энэ нь дэлхийг олон удаа устгах хүчин чадалтай гэж Америкийн Шинжлэх Ухааны Холбоо (FAS) мэдээлсэн байна.
Тус байгууллагын тооцоогоор, ОХУ 5,459 ширхэг, АНУ 5,177 ширхэг цөмийн цэнэгт хошуутай.
“Манай стратегийн хүчнүүд Оросын Холбооны Улс болон Холбооны Улсын аюулгүй байдлыг бүрэн хангах чадвартай” гэж Путин хэллээ.
Reuters.com. 26th Oct
