Монгол Улсын загвар, медиа салбарын төлөөлөл Ө.Содгэрэл олон улсын нэр хүндтэй BoF 500 Class of 2025 жагсаалтад нэрлэгдлээ. Тэрбээр энэхүү жагсаалтад Монгол Улсаас нэрлэгдсэн анхны төлөөлөл болсноор салбартаа түүхэн амжилт бүтээв.
BoF (Business of Fashion) нь жил бүр дэлхийн загварын салбарыг чиглүүлэгч, нөлөө бүхий 500 эрхмийг тодруулан BoF 500 жагсаалтаа шинэчилдэг уламжлалтай. Энэ нь салбарын бодлого, чиг хандлагыг тодорхойлдог дэлхийн хамгийн нэр хүндтэй жагсаалтын нэг юм.
Ө.Содгэрэл нь BURO. олон улсын дижитал сэтгүүлийн Монгол дахь салбарын үүсгэн байгуулагч, мөн Вэлин ХХК (Velin) хэвлэл мэдээлэл, креатив агентлагийн Ерөнхий захирлаар ажилладаг. Түүний удирдлага дор эдгээр платформууд нь Монголын загвар, урлаг, хэрэглэгчийн соёлыг олон улсын түвшинд холбох шинэлэг медиа орон зайг бүрдүүлж буйг BoF онцлон тэмдэглэжээ.
