Монгол Ардын намын бага хурал өнгөрөгч амралтын өдрөөр болж, шинэ намын даргаар Д.Амарбаясгалан сонгогдож, Ерөнхий сайд асан Л.Оюун-Эрдэнэ тамгаа гардуулж өгсөн билээ. Бага хурлын санал хураалт хуулийн дагуу өрнөсөн эсэх асуудал дээр тус намын зарим гишүүн маргаантай, Улсын Дээд шүүх албан ёсоор намын даргыг баталгаажуулаагүй байгаа боловч Хөдөлмөрийн үндэсний нам болон Иргэний зориг ногоон намаас цахим хуудсаараа дамжуулан УИХ-ын дарга Д.Амарбаясгаланд баяр хүргэжээ. Харин намын даргын асуудал нь төрийн хямрал боллоо гэж Ардчилсан намын улс төрийн зөвлөл, УИХ дахь Ардчилсан намын бүлгийн өргөтгөсөн хурлаас доорх шаардлагыг Ерөнхий сайд болон УИХ-ын даргад хүргэжээ. Түүнийх нь хариуд УИХ-ын дарга Д.Амарбаясгалан албан ёсны цахим хуудсаараа хариу тайлбар хийжээ.
Манай улс цахим үндэстэн юм болохоор цаг хэмнэж, хэзээний л шуурхай ажилладаг төрийнхөн маань “фэйсбүүкээр” ажлаа гялалзуулав. ХҮН, ИЗНН ч яах вэ. Учир мэдэх, улс төр бичдэг хүмүүсийн хэлдгээр хамтарсан засгийн хаяанд байгаа юм чинь баяр хүргэх нь зүй ёсных биз. Харин Ардчилсан намын дарга О.Цогтгэрэлийн хийсэн мэдээллийн дараа УИХ-ын дарга Д.Амарбаясгалан цахим хуудастаа мэдэгдэл нийтэлжээ.
Тэрбээр, “Ардын намын Бага хурлын гаргасан шийдвэртэй холбогдуулан Ардчилсан намын дарга мэдээлэл хийжээ. Улс төрийн намууд бие биенийхээ дотоод асуудалд оролцох нь зохисгүй бөгөөд шүүх тогтоогоогүй тохиолдолд хэнийг ч гэм буруутай гэж үздэггүй Үндсэн хуулийн зарчимтайг Та мэдэх бизээ. Дашрамд, миний бие өнөөдрийг хүртэл хууль хяналтын байгууллагад аливаа асуудлаар шалгагдаагүй болно. Харин надтай холбоотой зохион байгуулалттайгаар тараасан гүтгэлгийг шийдвэрлүүлэхээр холбогдох байгууллагуудад шалгуулахаар хандсаныг үүгээр мэдэгдэж байна” гэжээ.
