Эрүүл бие ихийг хийж бүтээнэ. Зах хязгаар нь үл харагдах том мөрөөдлийн эзэн та өөрийгөө хөгжүүлж, зорилгодоо хүрэхийн гол үндэс нь эрүүл бие. Тиймээс шинэ үеийн залуус та бүхэн эрүүл мэндэд ач тустай хүнс хэрэглэхийг зөвлөж байна. Тэр дундаа доорх таван хүнсийг өдөр тутамдаа хэрэглэж заншаарай.
Самар – Таны эрүүл мэндэд ашиг тустай байгалийн гаралтай бүтээгдэхүүн бол самар юм. Цус харвах, зүрхний шигдээс өвчнөөс хамгаалдаг хамгийн сайн хүнс бол самар болон хушга юм. Гэхдээ их хэмжээгээр самар, хушгийг хэрэглэх нь хэт их калори үүсгэж биед сөрөг нөлөө учруулах аюултай. Омега 3 нь зүрх судас, мэдрэл ой санамж, нүдний хараа болон дархлааны системд эерэгээр нөлөөлдөг. Мөн арьсыг илүү залуу, өнгөлөг харагдуулдаг. Омега 3 тосны хүчил нь загасны маханд их хэмжээгээр агуулагддаг. Харин загасны маханд дургүй хүмүүс самарнаас энэ хүчлийг орлуулан авч болно.
Мөөг – Мөөгөнд хүний биед ашигтай антиоксидант бодис агуулагддаг. Мөөгөнд байх уураг, амин дэм зэрэг олон чухал шим тэжээлт бодис, бусад нэгдлүүдийн ач холбогдол нь өндөр юм. Мөөгөн дэх үрэвслийн эсрэг нэгдлүүд болон кали, В аминдэмүүд нь хүний бие организм, генд хүртэл гайхалтай нөлөө, тус хүргэдэг.
Бүхэл үрийн гурилан бүтээгдэхүүн – Бутлаагүй тариа буюу үр цацсан гурилан бүтээгдэхүүн нь хүний биед хэрэгтэй хүнсний бүтээгдэхүүн. Эрүүл хооллолт, хоолны дэглэмд ч чухал үүрэгтэй. Бүдүүн гэдсэн дэх хорт бактериудыг устгадаг онцгой бодис болох лигнин тарианы үрэнд байдаг ажээ. Мөн цусны даралт ихтэй хүмүүс тарианы бутлаагүй үрээр хийсэн гурилан бүтээгдэхүүнийг хэрэглэвэл үр дүнтэй.
Ногоон цай – Ногоон цай нь хүний стрессийг багасгадаг бөгөөд энэ нь зүрхэнд эерэгээр нөлөөлдөг байна. Та өдөрт 2-3 аяга ногоон цай ууж хэвшвэл зүрхний шигдээсээр өвдөх магадлал 21 хувиар буурна. Ногоон цайнд цус бүлэгнэхээс сэргийлэх үйлчлэлтэй катехин хэмээх бодис ихээр агуулагддаг.
Сармис – Хоол хүнсэндээ сармисыг тогтмол хэрэглэснээр та судас бөглөрөх аюулаас, цаашилбал атеросклероз буюу судасны хатуурлаас ч өөрийгөө хамгаална. Мөн цусны даралт бууруулах тустай. Сармисанд агуулагдах олон төрлийн антиоксидантууд зүрх, судасны үйл ажиллагааг дэмждэг юм.
