Даваа гараг нь олон хүний хувьд хамгийн их “айдас төрүүлдэг” өдөр байдгаас гадна сэтгэл зүй, эрүүл мэнд, нийгмийн судалгаанд маш их дурдагддаг өдөр ажээ. Тэгвэл энэ удаагийн “MORNING BIRD” буландаа энэхүү өдөртэй холбоотой сонирхолтой баримтуудыг хуваалцахаар бэлтгэлээ.
Шинэ дадал зуршил эхлүүлдэг өдөр
Лондоны Их сургуулийн судалгаагаар хүмүүсийн 70 хувь нь шинэ дадал зуршил, дэглэмийг даваа гарагт эхлүүлэхийг илүүд үздэг гэжээ. Энэ нь шинэ зүйл эхлэх сэтгэлзүйн нөлөөтэй холбоотой бөгөөд жилийн эхний өдөр, төрсөн өдөр, эсвэл долоо хоногийн эхний өдөр зэрэг тодорхой мөчид хүмүүсийн шийдвэр гаргах эрмэлзэл хамгийн өндөр байдагтай холбоотой аж. Нээрээ л бид аливаа зүйлийг эхлүүлэхдээ ямар нэг онцгой өдрийг хүлээгээд байдгаа өөрсдөө ч анзаардаггүй байж болох л юм.
Зүрхний шигдээсийн эрсдэл
Нэгэн судалгаанд зүрхний шигдээсний тохиолдол даваа гарагт бусад өдрөөс 15–20 хувь илүү бүртгэгддэг гэжээ. Судлаачид үүнийг амралтын дараа ажлын стресс нэмэгддэгтэй холбон тайлбарладаг. Нээрээ л амралтын өдрөөр тайван амгалан байж байгаад даваа гарагт эрт сэрж, замын түгжрэлд бухимдахаас авхуулаад стресс нэмэгдэж эхэлнэ. Энэ бүгд бидний зүрх судасны тогтолцоонд илүү дарамт үзүүлдэг байх нь ээ.
Monday blues буюу даваа гарагийн гуниг
Олон улсын судалгаагаар хүмүүсийн хамгийн их гутардаг өдөр нь “даваа гараг” гэжээ. Амралтын хоёр өдөрт амьдралын хэв маяг өөр болчихдог шүү дээ. Оройтож унтах, зав чөлөөтэй байх, найз нөхөдтэйгөө уулзах, гэр бүлтэйгээ цагийг өнгөрөөх гэх мэт. Харин нэг дэх өдрийн өглөө эрт сэрээд, ажил эсвэл сургуульдаа очих шаардлага бидний тархинд “аз жаргалын горим”-оос “хариуцлагын горим” руу огцом шилжих дохио өгдөг. Энэ шилжилт сэтгэл зүйд дарамт үүсгэж, бидний хэлдэгээр “Monday Blues” буюу ажлын гунигийг бий болгодог байна. Зарим хүн бүр амралтын өдрийн орой л бодлоороо урьдчилж бухимдаж эхэлдэг гэжээ. Харин судлаачид хэлэхдээ, энэ мэдрэмжийг багасгах хамгийн энгийн арга бол амралтын өдрүүдийн унтах, босох цагийг ажлын өдрүүдийнхээсээ хэт холдуулалгүй байх, даваа гарагийн өглөөг дуртай зүйлээ хийж эхлүүлэх (кофе уух, дуртай хөгжмөө сонсох) зэрэг нь даваа гарагийн гунигийг арай багасгадаг байна.
Эрүүл мэндийн хөдөлгөөнүүд
Даваа гараг бол хүмүүсийн эрүүл мэнддээ хамгийн ихээр анхаардаг өдөр гэж хэлж болно. Жишээлбэл, тамхинаас гарах шийдвэр гаргах, холбогдох мэдээлэл хайх, зөвлөгөө авах эрэлт нь энэ өдөр бусад өдрөөсөө 25 хувиар илүү байдаг байна. Энэ нь хүмүүсийн тархи “шинэ долоо хоног = шинэ эхлэл” гэсэн дохио авч, илүү эрч хүчтэйгээр өөрчлөлт хийх сэдэлтэй болдгийг харуулж байна.
Ингээд бодохоор даваа гараг бол зүгээр нэг ажлын эхний өдөр биш байх нь ээ. Энэ өдөр хүмүүс хамгийн их шинэ зорилго тавьж, хамгийн ихээр гутарч бас эрүүл мэнддээ хамгийн ихээр анхаарах шийдвэр гаргадаг онцгой өдөр ажээ.
