Bpress.mn сайтын редактор, сэтгүүлч Б.Будхүүгийн “Дулаахан бороо” ном мэндэлжээ. Түүний ном 16 тэмдэглэлээс бүтсэн бөгөөд кирилл болон монгол бичгээр хэвлүүлсэн юм. “Дулаахан бороо” номын сэтгэл татам ТАВАН ишлэлийг хуваалцъя.
Шүхэр дэрвэлзүүлсэн хүчтэй салхитай бороо орж байна. Сайхан дурсамж гэдэг алхаж яваад гэнэт инээх оч, гуньж суухад сэргэх сэхээ, унаж явахад босох тэнхээ, алдаж явахад ухаарах мөч ер нь амьд явахын нэгэн учир юм даа.
Хол явна гэдэг чинь явах замдаа буцах тухайгаа бодохын нэр юм байна. Хол явах тусам ард үлдсэн бүхнээ улам хайрладаг нь хүний сэтгэлийн янз юм байна.
Ухааны сайн хүмүүс утгын сайхан зүйлстэй учрах зүрх сэтгэлийг баясгах юм. Илчтэй үгэнд дулаацаж, ирэх жаргалд итгэж, сайхан өдрүүдийг угтаж, үдэж явна.
Цоргих халуун, хайрах хүйтэн, зөөг бүлээн гээд олон өнгө дундаас даарсан гартаа ноосон бээлий өмсөх шиг, дутаж явсан үгээ сонсоод дотор баясах шиг дулаахан амьдралд хайртай.
Ямар олон хүн ийм тунгалаг агаарыг, ийм дулаан үдшийг, энэ л хотынхоо уур амьсгалыг, найз нөхдийнхөө инээд хөөрийг дурсаж бөөрөнхий дэлхийн аль нэгэн өнцөгт алхаж яваа бол.
