Гадаад харилцааны сайд Б.Батцэцэг Австралийн Холбооны Улсаас Монгол Улсад суугаа Онц бөгөөд Бүрэн эрхт Элчин сайд Лео Зенг-ийг 2025 оны 7 дугаар сарын 01-ний өдөр хүлээн авч уулзав.
Гадаад харилцааны сайд Б.Батцэцэг Ази-Номхон далайн бүс нутаг дахь манай чухал түнш, “гуравдагч хөрш” Австрали Улстай сүүлийн 50 гаруй жилийн хугацаанд хөгжүүлсэн найрсаг харилцаа, хамтын ажиллагаа “Өргөтгөсөн түншлэл”-ийн хүрээнд өргөжин бэхжиж буйд сэтгэл хангалуун байгаагаа илэрхийлэв. Тэрээр хоёр улсын хамтын ажиллагаа өнөөдөр улс төр, худалдаа, эдийн засаг, уул уурхай, батлан хамгаалах, хөдөө аж ахуй, боловсрол зэрэг олон салбарыг хамарч байгааг онцлоод, цаашид Австралийн Засгийн газрын тэтгэлгээр суралцаж буй оюутнуудын тоог нэмэгдүүлэх, сайн дурын англи хэлний багш нарыг Австралиас урьж ирүүлэхэд ач холбогдол өгч байгаагаа тэмдэглэв.
Түүнчлэн энэ жил Монгол Улсад зохион байгуулагдах Зүүн Ази, Латин Америкийн хамтын ажиллагааны форум /ФЕАЛАК/ болон Дэлхийн бизнес эрхлэгч эмэгтэйчүүдийн чуулга уулзалт зэрэг олон улсын арга хэмжээнд Австралийн Холбооны Улсаас төлөөлөгчид оролцож, хамтран ажиллана гэдэгт итгэлтэй байгаагаа илэрхийлээд, Элчин сайд Л.Зенг-д хариуцлагатай бөгөөд чухал үүрэгт ажилд нь амжилт хүсэв.
Элчин сайд Лео Зенг Монгол Улсад ажиллах хугацаандаа хоёр улсын харилцааны түвшинг ахиулж, харилцан ашигтай бүхий л салбарт хамтын ажиллагааг өргөжүүлэн хөгжүүлэх, чингэхдээ эдийн засгийн хамтын ажиллагааг төрөлжүүлэх, хөгжлийн албан ёсны тусламжийн хөтөлбөрүүдийг өргөжүүлэх, Австралийн Засгийн газрын тэтгэлгийн тоог нэмэгдүүлэхийн төлөө идэвхтэй ажиллахаа илэрхийлэв.