Европ тивийн ихэнх хэсэгт ойрын өдрүүдэд цаг агаар хэт халж байна. Хэт халууны үеэр иргэд оршин суугчдыг эрүүл мэнд, амь насаа хамгаалахыг сэрэмжлүүлж байна. Нөгөөтэйгүүр хэт халуун хуурай цаг агаарын улмаас ойн түймэр газар авах эрсдэл үүслээ. Тиймээс түймрийн бүсэд амьдардаг иргэдийг түр орогнох байр руу шилжихийг орон нутгийн эрх баригчид зөвлөж байна.
Хамгийн их халж байгаа нь Испани улс байна. Тус улсын Севиль мужид агаарын температур хамгийн өндөр тоог зааж байна. Мужийн ихэнх хэсэгт агаарын температур цельсийн 40 хэмтэй байна. Өнгөрсөн бямба гарагт Эль Гранадо сууринд агаарын температур цельсийн 46 хэмд хүрснийг Испанийн цаг уурын алба мэдээлжээ. Энэ зургадугаар сард Испани улсын хэмжээнд урьд өмнө тохиолдоогүй хамгийн халуун зургадугаар сар болж байгааг цаг уурчид хэлжээ.
Испани улсаас гадна Португал, Итали, Хорват, Франц, АВстри, БЕльги, Босни болон Херцеговини, Унгар, Серби, Словени, Швейцарь улсуудад хэт халуун цаг агаарын урсгал дайран өнгөрч байна.
Испанийн Барселонад өнгөрсөн амралтын өдөр хэт халуунд зам цэвэрлэж байсан эмэгтэй ээлжийн ажлаа дуусгаад нас баржээ. Түүний үхлийн шалтгааныг хэл халуунаас үүдэлтэй байж магадгүй гэж үзэн, мөрдлөг шалгалтын ажлыг явуулж байна.
Итали улсад хэт халуунд өндөр настай, хорт хавдартай болон орон гэргүй хүмүүс хэт халуунд цохиулах болон бусад халуунаас үүдэлтэй өвчин эмгэгээр өвчилж эмнэлэгт хандсан тохиолдол гарч байна. Италийн Болонья хотод халуунтай тэмцэж байгаа иргэддээ дэмжлэг үзүүлэхийн тулд агаар сэрүүцүүлэгч, үнэгүй усаар үйлчлэх долоон газрыг нээжээ. Мөн Ромд 70 гаруй усан санг үнэгүй болгох шийдвэр гаргасан байна. Италийн 21 хотод цаг агаарын онц ноцтой байдлаас сэрэмжлүүлэх аюулын дээд түвшний түгшүүр зарлажээ.
Португалын нийслэл Лисабон хотод иргэдийг өдрийг халуунд гэрээсээ гарахгүй байхыг анхааруулж байна. Гэсэн ч иргэд орон нутгийн удирдагчдын шийдвэрийг дагаагүйгээс болж наранд цохиулах, арьсаа гэмтээж түлэгдэх зэрэг тохиолдол олон гарчээ.
Балканы баруун хэсгийн улсуудад агаарын температур мөн цельсийн 40 хэмд хүрч халж байна. Серби улсад 19 дүгээр зуунд агаарын температур хэмждэг болсноос хойшхи хамгийн халуун өдөр өнгөрсөн бямба гарагт тохиожээ. Умард Македониад мөн агаарын температур цельсийн 42 хэмд хүрчээ.
Энэ мэтчилэн хэт халахтай зэрэгцэн бусад байгалийн гамшгууд үүсэх эрсдэл бий болж байна. Юун түрүүнд хуурайшилтаас үүдэлтэй ойн түймэр асах эрсдэлтэй байгааг орон нутгийн эрх баригчид Европ даяар сэрэмжлүүлж байна.
Эх сурвалж: eagle.mn
