Ид шидийн орон хөл бөмбөгийн талбайтай болжээ. Энэ тухай тус төслийн албан ёсны цахим хуудаст дараах талархлын мэдээллийг оруулжээ.
Jamo Grand-тай бид сүүлийн 3 жил хамтран ажиллаж, тус байгууллагаар дамжин эх оронд маань айлчилж буй жуулчдын зочлох нэг цэгээр Ид шидийн орон төвийг сонгож, жилд дунджаар 250–300 гаруй жуулчин Ид шидийн орон төвтэй ирж танилцдаг билээ.
Бид нэг ч гэсэн сайн туршлага, бүтээсэн зүйлээ тэдэнд танилцуулж, Монголчууд хүүхдийн төлөө нэгдэж чадсан юм шүү гэдгийг ойлгуулахыг хичээдэг.
Grand Circle Foundation-ны онцлог нь тэднийхээр аялж буй жуулчид заавал тухайн улсынхаа нийгмийн сайн сайхан байдалд хувь нэмэр оруулахыг уриалдаг.
Өнгөрсөн жилийн жуулчид Ид шидийн орон төсөлд зориулан нийтдээ 40 сая төгрөгийг цуглуулж, тус дэмжлэгээр бид хөлбөмбөгийн талбайтай болох төсөл бичсэнээр хүүхдүүдийн маань мөрөөдөл биеллээ олж байна.
Өмнө нь бид зөвхөн сагсанбөмбөгийн талбайтай, хоёр талдаа хэдхэн хүүхэд тоглоход л дүүрчихээд байсан учраас нэмэлтээр хөлбөмбөгийн талбайтай болох нууцхан хүсэл нэлээн удаан тээж явсан.
Энэ талбайг зөвхөн хөлбөмбөгийн талбай бус волейболын талбай хэлбэрээр ашиглах боломжтойгоор бүтээн байгуулсан нь хамгийн зөв шийдэл байж чадсан.
Зөвхөн аялаад буцах биш, хүүхэд багачуудад инээд хөөр, баяр баясал, хүсэл мөрөөдлийг энэхүү талбайгаар дамжуулан бэлэглэж буй жуулчдадаа маш их баярлалаа.
Мөн энэхүү санаачилгыг анх 2022 онд эхлүүлж, алслагдсан бүс нутгийн хүүхдүүдэд тэгш боломж олгох зорилт тавьж, Шинжлэх ухааны танхим, Монголын анхны Шинжлэх ухааны тоглоомын талбайг хүртэл бүтээн байгуулж өгсөн Grand Circle-ийн хамт олондоо үргэлж талархаж явдагаа илэрхийлье.
