BLACKPINK охидын хамтлаг бүрэн бүрэлдэхүүнээрээ буюу дөрвүүлээ эргэн нэгдэж фэнүүддээ удахгүй болох дэлхийн аялан тоглолтынхоо талаар танилцууллаа.
Хамтлагийн агентлаг болох YG Entertainment өчигдөр буюу пүрэв гарагт "Deadline" аялан тоглолтын тизер видеог албан ёсны сошиал хуудсаараа дамжуулан нийтэлсэн.
Роуз өргөн уудам цөлд утасны бүхээгээс залгаж байгаагаар видеог эхлүүлнэ. Түүний хамтлагийн найзууд Лиса, Женни, Жисү нар нэг нэгээрээ гарч ирж, түүнтэй хамт аялалд гарч байгаагаар тизер өрнөнө.
“Трейлерийг Калифорниа мужийн Ланкастер хотын ойролцоох газар болон Холливудын студид олон улсад нэр хүндтэй найруулагч нартай хамтран хийсэн” гэж YG Entertainment хэвлэлийнхэнд мэдэгджээ.
ТИЗЕРИЙГ ҮЗЭХ: https://www.youtube.com/watch?v=8YiR9v3sOpk
“Deadline” аялан тоглолт долоодугаар сарын 5-6-нд Сөүлийн ойролцоох Гоян хотын Гоян спорт цогцолборын төв цэнгэлдэх хүрээлэнд эхэлнэ. Аялан тоглолт дэлхийн 16 хотоор аялах төлөвлөгөөтэй аж.
Гоянгийн тоглолтуудын үеэр BLACKPINK хоёр жил найман сарын дараа анхны шинэ цомгоо гаргах гэж буй юм.
