Аялал жуулчлалын оргил улирал эхэлж буй энэ үед Япон улс Азийн орнуудаас ирэх жуулчдын тоо огцом буурч байгаа талаар олон улсын хэвлэлүүд мэдээлж байна. Энэ нь “ирээдүйн газар хөдлөлтийг урьдчилан таамагласан” хэмээн олон нийтийн сүлжээнд нэрд гарсан манга зохиолтой холбоотой ажээ.
Тодруулбал, манга зохиолч Рёо Тацүкигийн “The Future I Saw” хэмээх бүтээлд 2025 оны долоодугаар сарын 5-нд Японд хүчтэй газар хөдлөлт болно хэмээн дүрслэгдсэн байдаг. 2011 оны Тохокүгийн газар хөдлөлтийг таамагласан мэтээр нэрд гарсан энэ манга нь дахин анхаарал татаж, Азийн улс орнуудын иргэдийн дунд болгоомжлол төрүүлээд байна.
Энэхүү цуу ярианы улмаас Өмнөд Солонгос, Тайвань, Хонконг зэрэг орноос ирэх аяллын захиалга эрс буурч, жишээлбэл, Хонконгоос ирэх захиалга өмнөх оны мөн үетэй харьцуулахад 50%, долоодугаар сарын эхээр 83%-иар буурсан тухай “The Guardian” мэдээлжээ. Зарим агаарын тээврийн компаниуд Япон руу хийх нислэгээ цөөрүүлэх арга хэмжээ авч эхэлсэн байна.
Харин Японы засгийн газар болон газар хөдлөлтийн мэргэжилтнүүд энэ таамаглалыг үндэслэлгүй, шинжлэх ухааны үндэстэй биш хэмээн няцааж, олон нийтэд баталгаатай мэдээлэлд итгэхийг уриалж байна. Мияги мужийн захирагч энэхүү цуу яриа нь бүс нутгийн аялал жуулчлалд сөргөөр нөлөөлж буйг онцолжээ.
