УИХ-ын Дарга Д.Амарбаясгаланд жагсагчдын төлөөлөлтэй 24 цагийн дотор уулзах шаардлага хүргүүлсний дагуу хариуг өнөөдөр /2024.05.29/ өгч, уулзалт хийлээ.
Уулзалтад:
Улсын Их Хурлын Дарга Д.Амарбаясгалан
УИХ-ын гишүүн, Төрийн байгуулалтын байнгын хорооны дарга Ж.Бат-Эрдэнэ
УИХ-ын гишүүн, МАН-ын төлөөлөл П.Сайнзориг
УИХ-ын гишүүн, АН-ын төлөөлөл Б.Жаргалан
УИХ-ын гишүүн, ХҮН-ийн төлөөлөл Г.Уянгахишиг
УИХ-ын гишүүн, ИЗНН-ийн төлөөлөл Б.Батбаатар
УИХ-ын гишүүн, Үндэсний Эвслийн төлөөлөл Д.Пүрэвдаваа
УИХ-ын Ерөнхий Нарийн бичгийн Дарга Б.Баасандорж нар жагсагчдын төлөөллийг хүлээн авч уулзав.
Тодорхойлсон 3 шаардлагын хүрээнд товлосон уг уулзалтаар дараах байр суурийг УИХ-ын Дарга болон гишүүд илэрхийллээ.
Залуусын тайван замаар эвлэлдэн нэгдэж байгаа жагсаалыг ихэд үнэлж, хүндэтгэж байна. Та бүхний шаардлагыг чих тавин сонсож байгаа.
126 гишүүнтэй болж өргөжсөн Улсын Их Хурал хариуцлагатай, ёс зүйтэй, ил тод улс төрийн соёлыг бэхжүүлэхээр ажиллаж байна. Улс төрийн намуудын үзэл баримтлалаас үл хамааран зарчмын асуудлууд дээрээ нэгдмэл буй.
Үүсээд буй асуудлыг Парламент зохих үйл явцын дагуу шийдвэрлэнэ. Шийдвэрлэх явцдаа Үндсэн Хуулийг дээдлэнэ. Даваа гарагт Төрийн Байгуулалтын Байнгын Хороогоор ороод, ирэх Пүрэв гарагийн нэгдсэн хуралдаанаар хэлэлцэх төлөвлөгөөтэй.
Зөвхөн Засгийн Газраас өргөн барьсан тогтоолын төслийн хүрээнд хязгаарлалгүйгээр Улсын Их Хурлын бүх гишүүд нээлттэй асуулт асууж, тодруулга авна. Иймд жагсагчдын тодруулмаар байгаа асуултуудыг ч гишүүд бүх талаас нь илэрхийлнэ.
Асуудлыг зөв шийдэх дээр хичээнгүйлэн ажиллаж буй тул иргэдийг Парламентад итгэх итгэлээ алдахгүй байхыг уриаллаа.
Бидний жагсаал үр дүнгээ өгч эхэлсээр байна. Жагсаалын шаардлага удахгүй биелэх хүртэл бүгдээрээ иргэдийн элч төлөөлөл болсон УИХ-ын гишүүдээ уриалж, биднийг дэмжээрэй.
