Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс Авлигатай тэмцэх газрын урьдчилан сэргийлэх, соён гэгээрүүлэх хэлтэстэй хамтран жил бүр зохион байгуулдаг авлига, ашиг сонирхлын зөрчлөөс урьдчилан сэргийлэх, авлигын гэмт хэргийн талаарх ээлжит сургалтыг цахим хэлбэрээр 2025 оны 05 дугаар сарын 28-ны өдөр зохион байгуулав.
Сургалтад салбар болон аймаг, дүүргийн Эрүүл мэндийн магадлалын зөвлөлийн 250 гаруй дарга, гишүүд хамрагдаж Авлигатай тэмцэх газрын урьдчилан сэргийлэх, соён гэгээрүүлэх хэлтсийн комиссар М.Жамъянчойжил авлигын шалтгаан, нөхцөл, түүнээс урьдчилан сэргийлэх эрх зүйн зохицуулалтын талаар дэлгэрэнгүй мэдээллийг хийлээ.
Сургалтын үеэр оролцогчдын сонирхсон асуултад хариулж, авлигын эрсдэлээс урьдчилан сэргийлэхэд авах арга хэмжээ, ашиг сонирхлын зөрчлийг мэдээлэх талаар тодорхой жишээ, кейсүүдийг хэлэлцсэн юм.
