Дархан-Уул аймгийн зарын нэгдсэн группт Бат-Оргил гэх хаягаас “Байр хямд үнээр түрээслэн” гэх зар мэдээллийг энэ оны 05 дугаар сарын 05-аас 05 дугаар сарын 07-ны өдрийн хооронд байршуулж, нийт 3 иргэнээс 9,400,000 төгрөг авч, залилсан гэх үйлдлийг тус аймгийн цагдаагийн газраас шалгаж байна.
Энэ төрлийн гэмт хэрэг үйлдэгч этгээдүүд нь бусдын орон сууц түрээслэн, худалдана гэх зар мэдээлэл дээрх гэрэл зургийг хуулбарлан авах эсвэл үл хөдлөх хөрөнгийн гэрчилгээг хуурамчаар үйлдэх зэрэг байдлаар байр түрээслэх хэрэгцээ шаардлагатай иргэдийг мэдээллээр төөрөгдүүлж, эд хөрөнгийг нь хуурч мэхлэн авдаг. Мөн энэ оны эхний 4 сарын байдлаар цагдаагийн байгууллагад “Залилах гэмт хэрэг” 5744 бүртгэгдсэн нь нийт гэмт хэргийн 30.9 хувийг эзэлж байна. Иргэд та бүхэн амар хялбар аргаар мөнгө олох зорилготой этгээдүүдэд таны өмчлөх эрхэнд халдах боломжийг бүү олгоорой.
Эх сурвалж: ЦЕГ
