Сүүлийн жилүүдэд технологийн хөгжил хурдацтай урагшилж байгаа ч, хуучин загварын товчлууртай гар утаснууд дахин эрэлттэй болж байна. Олон улсын болон дотоодын онлайн худалдааны платформууд дээр 2000-аад оны Nokia, Motorola, Sony Ericsson зэрэг брэндийн “ретро” утаснууд өндөр үнээр арилжаалагдаж, цуглуулагчдын гол сонирхол болжээ.
Мэргэжилтнүүдийн үзэж буйгаар зарим хуучин утаснууд маш бат бөх, удаан эдэлгээтэй байдгаас мөн орчин үеийн “ухаалаг” төхөөрөмжөөс залхсан хэрэглэгчид энгийн хэрэглээ рүү эргэн шилжих болсон нь хуучин утасны эрэлтийг үүсгэж байгаа аж.
Түүнчлэн сүүлийн үед “дижитал детокс” буюу интернэт болон ухаалаг төхөөрөмжөөс түр холдох хөдөлгөөн дэлхий даяар хүчээ авч байгаа нь хуучин утасны хэрэглээг нэмэгдүүлэхэд хүргэж байна. Ялангуяа Nokia 3310, Motorola Razr V3 зэрэг утаснууд цуглуулагчдын хувьд ховор, үнэ цэнтэй эдлэлд тооцогдож мянга гаруй ам.доллароор ч зарагдах тохиолдол их байна.
