Хөдөөгөөр аялж явахад хонины гэдэс чанасан айл миний хувьд хамгийн чинээлэг бас сайхан сэтгэлтэй нь. Толгой шийр хаясан байвал бүр дээд зэрэглэлийнх. Хаяанд нь манаж суугаад ч хамаагүй аяга шинэ шөл, хуруу цус огтолчихсон байхад под хийчихнэ. Ходоод ч тэр, сэтгэл ч тэр дүүрэн. Аль ч рестораны гол махан стейкээс илүү сэтгэл хангалуун болгож чаддаг ганц хоол бол чанасан гэдэс. Ямар сайндаа Улаанбаатар хотын өнцөг булан бүрээс цус цутгасан гэдэс хайна. Олдох юм бол яаж ч бороо шороо орж, зам харгуй түгжирсэн ч хамаагүй очиж аваад гэртээ чанана. Орцоор ороход гэдэс үнэртвэл намайг гэдгийг гэрийнхэн төвөггүй мэднэ. Хотжсон амьдралдаа дассан хүмүүс болохоор тостой холилдлоо, үнэр танар авах юмгүй гэж маяглана. Надад бол хамаагүй. Тэр шөлний үнэр намайг амьдарч байгааг мэдрүүлэх шиг болдог юм. Багад манай өвөөгийнх Шувуунд амьдардаг байлаа. Үхэртэй. Халзаа, дэлдэн шар, хөөрхөнөө, гунж, жижиг халзаа гээд нэртэй. Өвөл үхэрт өвс тавьж өгөх, зун хүйтэн ус зөөх хамгийн сайхан ажил. Нэг тийм шинэ шөл халуунаар нь сорж суух шиг санагддаг. Хэдий хот бараадаж амьдардаг ч гэсэн жил ирэх тусам уламжлалт Монгол ахуйдаа хорогдож, татагддаг ажээ. Хотоос гараад давхихаар л эрч хүч сэлбэгдээд, үг олшроод, сэтгэл сэргээд ирэх нь сайхан. Түмэн одоор хучиж унтаад өглөө сэрэхэд дахин төрсөн юм шиг л хөнгөн. Дараа нь элдэв амтлагчгүй хэрнээ цаанаа шимтэй Монгол хоолоор өлөө тайлах уу. Хэлэх үг багадна. Дахин төрөөд зуу зуун жил амьдармаар аа гэдэг шиг жил ирэх тусам Монгол ахуйдаа ойртохыг хүснэ. Машинтай давхиж очоод мал гаргуулж идчихээд буцах биш. Хонь малынх нь амыг эргүүлж, саравч хотыг нь барилцаж, гэрийг нь хөнгөлж эсвэл дулаалж өгөхсөн. Нэмэр болохсон. Ахуйн түмэн ажилд нь Монгол хүн шиг оролцохсон. Хөдөөнөөс гэрт айраг ирлээ гэвээс ажил тарахыг тэвдэн хүлээнэ. Хөдөө айл руу явна гэвээс гэдэс чанах юм болов уу гэж горьдон хүлээнэ. Нэг л тийм хээр сул давхисан, Монгол үнэртсэн болгонд дотроосоо шунах шиг. Үүнээс илүүг хүсэлтгүй ээ. Энэ л сайхан. Энд улсад төрж өссөндөө бахархахад энэ л хангалттай. Хөдөөгөөр аялж явахад хонины гэдэс чанасан айл миний хувьд хамгийн чинээлэг нь …
ШИНЭ ҮЕИЙН МЭРГЭН УХААН
HUMANZ РЕДАКЦ
