Засгийн газраас өнгөрсөн оны арваннэгдүгээр сарын 15-наас эхлэн эрчим хүчний үнийг хэрэглээнээс нь хамааран 30-85 хувиар нэмэгдүүлж байгааг мэдэгдсэн бол дулааны үнийг 2025 оны тавдугаар сард нэмэгдүүлэхээ мэдэгдсэн. Тэгвэл ирэх тавдугаар сарын 16-наас дулааны үнийг 85 хувиар нэмэхээр болжээ. Ингэхдээ “зөвхөн нийслэлийн орон сууцны хэрэглэгчдэд хамаатай” хэмээсэн юм.
Тэгвэл цахилгаан, дулаан, усны үнийн өсөлт иргэдийн амьдралд хэрхэн нөлөөлөх вэ?
-Цахилгаан, дулаан, усны үнийн өсөлттэй зэрэгцэн айл өрхийн хэрэглээний зардал нэмэгдэж, бусад хэрэгцээнд зарцуулах мөнгө багасна.
-Бизнесийн салбар үйлдвэр, аж ахуйн нэгжүүдийн үйл ажиллагааны зардал нэмэгдэж, үүнийг бараа бүтээгдэхүүний үнэд шингээж, бүтээгдэхүүн, үйлчилгээний үнэ өснө.
-Үйлдвэрлэл буурах, зарим аж ахуйн нэгжийн хувьд ашиг буурч, ажиллах хүч хасах нөхцөл үүсэх боломжтой.
-Инфляц ба эдийн засаг суурь үйлчилгээний үнэ өссөнөөр өргөн хэрэглээний бараа, хүнсний бүтээгдэхүүний үнэ нэмэгдэж, инфляцыг өдөөх эрсдэлтэй.
-Иргэдийн худалдан авах чадвар буурах нь эдийн засгийн өсөлтөд сөргөөр нөлөөлнө…
Үнийн өсөлтийг зөвхөн хэрэглэгчдэд нялзааж, эрчим хүч, дулааны салбарын бүтцийн алдаа, ашиггүй зардлуудыг бууруулахгүй байх нь эдийн засаг, ард иргэдэд сөргөөр нөлөөлнө. Энэ асуудлыг зөвхөн тариф нэмэх замаар шийдэх нь богино хугацаанд алдагдлыг нөхөх ч урт хугацаанд эдийн засгийн хямрал, амьжиргааны түвшний доройтол, бизнесийн үйл ажиллагаанд доголдол үүсгэх эрсдэлтэй.
