Монгол Улсын гавьяат тамирчин Э.Цэндбаатар өнөөдөр буюу 2024 оны аравдугаар сарын 17-ны өдөр мэргэжлийн боксын 11 дэх тулаанаа хийн ялалт байгуулж, WBA холбооны төвийн бүсийн шинэ аваргаар тодорлоо. Мөн өнөөдөр түүний төрсөн өдөр бөгөөд 28 нас хүрч байгаа юм.
Түүний аваргын ялалтын тулааны өрсөлдөгч нь 10 дараалан ялсан Доминикан улсын тамирчин Фрэнси Фортунато байсан юм. 10 үеийн тулааны дараа шүүгч нарын 100 хувийн саналаар Э.Цэндбаатарт ялалтыг өглөө.
Тоглолтын дараа тэрбээр “Мөрөөдлийнхээ жижигхэн хэсэгтээ хүрлээ. Тусалж дэмждэг багш, менежер бүх хүмүүст мөн Монголынхоо ард түмэнд баярлалаа. Бокс тоглож байгаа монголын ирээдүй болсон дүү нартаа хүсэл тэмүүлэлтэй байгаарай гэж захиж хэлье. Монголчууд дайчин ард түмэн. Бүгд чадна” хэмээн сэтгэгдлээ илэрхийлсэн юм.
