Сэтгэл хоргодох гоё сайхан зүйлс дүүрэн болохоор эх орондоо амьдрахаар зориг гарган буцаж ирсэн ч сайны хажуугаар саар гэгчээр шүүмжлэлтэй, засаж сайжруулмаар зүйлсийг бишгүй анзаарлаа. Нэгдүгээрт хотын соёл бол анхаарахаар болсон хүнд сэдвийн нэг болжээ. Гадуур явж байхад хэн дуртай нь хүссэн газраа бие засаж, нус цэр, хогоо хаях юм. Нэмээд хүний биед санаатайгаар дураараа хүрдэг. Автобусанд явж байхдаа хэд хэдэн удаа маш бүдүүлэг хүмүүстэй таарсан. Бүр автобуснаас буух үед бөгснөөсөө хүртэл базуулж байсан. Үнэхээр хүмүүс ийм бүдүүлэг, ийм хүний эрхийн мэдрэмжгүй байгаа нь айдас хүргэм…
Хоёрдугаарт жижиг боловч баруун гарын дүрмээр явдгийг дадал болгочихвол их хэрэгтэй санагдах юм аа. Ядаж гарцаар гарах, явган хүний замаар зорчих үед нэгэнтэйгээ мөргөлдөх аюулгүй.
Гуравдугаарт үйлчилгээний соёл. Ээ бурхан минь, хамаг сайхан зангаараа байсан ч зарим газрын хүмүүс үнэхээр байдлыг хэцүү болгодог. Үйлчлүүлэгч хаан биш ч хэн хэндээ найрсаг хандах нь тийм ч хэцүү зүйл биш шүү дээ уг нь…
Дөрөвдүгээрт амьдарч байгаа газар, алхаж яваа орчин маань дэндүү шороо тоос ихтэй. Анхнаасаа стандарт гэж зүйлийг мөрддөггүй, баримталдаггүй хүмүүс хийгээд тэрийг нь тоох ч үгүй хүлээж авдгийн балгаар бид ямар ч ногоон байгууламжгүй орчинд аж төрж байгаа нь үнэхээр харамсалтай.
Ингэн ингэн хотод байж байснаас орон нутагтаа очиж ажиллаж, амьдаръя гэхээр тэнд ч бас асуудал бий. Ажлын байр байхгүй, цалин бага, дэд бүтэц муу…
Ер нь тэгээд төрийн бодлогоос гадна иргэд бидний ухамсар өөрчлөгдөж байж эх орон маань илүү сайхан болно гэдгийг л сайн ойлгож байна даа. Миний дээр дурдсан болон дурдаагүй үлдээсэн агаарын бохирдол, түгжрэл зэрэг асуудлуудад шийдвэр гаргагчдын хувь нэмэр том нөлөөтэй ч нөгөө талд иргэд бид өөрсдөө хөгжиж, ухамсарлахгүй бол хүсээд байгаа сайхан ирээдүй улам л алсрах биз ээ…
Б.ПҮРЭВЦЭЦЭГ
