Манай гэр бүл Сүхбаатар дүүргийн IX хороонд байр түрээсэлж амьдардаг. Өөрөөр хэлбэл өөрийн гэсэн байргүй залуу гэр бүлийн нэг л дээ. Тэгээд ч ажил маань хотын төвд учир аль болох ойрхон амьдрахгүй бол хамаг цагаа түгжрэлд өнгөрүүлэх эрсдэлтэй. Нэмээд цэцэрлэгийн насны хүүхэдтэй учир эрсдэлээ тооцсон ч ажил, цэцэрлэг, гэр гурваа ойрхон байлгах нь амьдралын чанарт асар нэмэртэй байдаг юм. Гэхдээ ингэж амьдрах нь залуучууд биднээс өндөр өртөг шаарддаг. Дүрмийн дагуу хотын төв рүүгээ дөхөх тусам түрээсийн үнэ, цэцэрлэгийн төлбөр маш өндөр. Мөнгөө хэмнээд төвөөс зайдуу байя гэвэл ажилдаа ирж, очих гээд багадаа гурван цагийг түгжрэлд өнгөрүүлнэ. Хүйтэнд бол байдал бүр л хэцүүдэх нь ойлгомжтой.
Яахав өөрийн гэсэн байргүй байгаа нь миний асуудал ч бодит байдал дээр надаас шалтгаалахгүй саад тотгор нийслэл хотод маань дэндүү их.
Жишээлбэл, түгжрэхгүйгээр хүүхдээ хүргэж өгөөд, ажилдаа хоцрохгүй очихын тулд өндөр түрээс төлж амьдарна. Цэцэрлэг хүртээмжгүйн улмаас хүүхдээ хувийн цэцэрлэгт өгнө. Охиндоо скүүтэрийг нь унуулъя гэхээр өргөж тавьсаар таарна. Явган алхахаар тоос шороо ам хамар руу ороод хэцүү. Тэгээд болоогүй ардчилсан оронд байгаа хэрнээ машинаа долоо хоногийн хоёроос гурван өдөр унах эрхгүй буюу дугаарын хязгаарлалтад орно. Бас манай байр гэлтгүй ойр хавиар зогсоолын асуудал маш хүнд. Түгжирч түгжирч ирээд дахиад зогсоол хайсаар цагаа үрнэ гээд тоочвол тоймгүй олон. Бид уг нь түгжрэлгүй амьдардаг бол ажлаа тараад эртхэн гэртээ хариад, амттай хоолоо идээд, хүүхдэдээ хангалттай цаг гаргаад, өөртөө цаг гаргаад цаашлаад стресс багатай аж төрж, ажлаа ч урамтайхан хийх сэн. Ингээд бодохоор түгжрэлээс үүдэлтэй алдагдсан боломжоо хэнээс, хаанаас нэхэх вэ? Сүүлдээ бараг “түгжрэл”-ийг ярьсан нэгнээ буруутгаж, түгжрэлээ тооцоогүй нь тэр хүний буруу болдог болтлоо бид муу муухайтай эвлэрч амьдарч байгаа нь харамсалтай. Гэтэл ажил хоорондоо алхдаг надад л ингэж их хэцүү байхад бизнес эрхлэгчид, хүргэлт хийдэг хүмүүст ямар байх нь ойлгомжтой.
За, тэгээд үе үеийн шийдвэр гаргагч нарын хувиа хичээсэн, шуналт зангийн төлөөсийг эцэг эх, үр хүүхэдтэйгээ хамт үргэлжлүүлж үүрэхгүйн тулд одоо болох орон нутгийн сонгуульдаа заавал оролцоорой. Яг миний дээр дурдсан асуудлыг шийдэх, анхаарах, ажил хэрэг болгох ёстой хүмүүс чинь энэ сонгуулиар сонгогдох хүмүүс юм аа. Хэрэв та түгжирдэг, утаагаар амьсгалдаг, аюултай замаар алхдаг, зогсоол хайж стресстдэг, стандартгүй нөхцөлд амьдардаг л бол заавал сонгуулиа өгөөрэй. Мэдлэггүй, хүн чанаргүй, шуналтай, хувиа хичээсэн цүнх баригч хүн таныг төлөөлөхийг битгий зөвшөөр…
М.ҮЙЛСДЭЛГЭР
