Дэлхий дээр бидний мэдэхгүй олон гайхширал төрүүлэм зүйл бий. Тэгвэл хамгийн сонирхолтой таван жижиг буудлыг хуваалцъя.
- Унтлагын лаборатори
Зүүн хойд Фүкүокагаас Хоккайдо арал хүртэл Япон улс даяар тархсан 13 салбар зочид буудал бүхий сүлжээ нь “Есөн цаг” нэртэй унтах лабораторитой. Энэхүү унтлагын бүхээгүүд нь үйлчлүүлэгчдийн унтлагыг мэдээллийг хадгалдаг гэдгээрээ онцлогтой. Шинагава станц болон Акасака салбарууд нь зочдод “9 цагийн нойр шалгах” үйлчилгээг санал болгодог бөгөөд мэдрэгч төхөөрөмж нь амьсгалын хэмнэлээс эхлээд нүүрний хувирал хүртэлх бүх зүйлийг илрүүлж, зүрхний цохилтыг хянаж, бүр хурхиралтыг ч бичиж авдаг байна. Ихэнх аялагчид сайн амралт гэхээсээ илүү аль болох хямд төсвийг чухалчилдаг тул “Есөн цаг” нь шинэлэг сонголт юм.
- Тэнгэрт авирах нь
Перу улсын Сакред хөндийд, хадан хясаанаас бэхлэгдсэн унтлагын “хорго”-нд унтах нь хүн бүрийн хүсээд байх зүйл биш ч адал явдлаас адреналин авдаг хүмүүсийн зорих газар яалт ч үгүй мөн.
400 метрийн өндөрт бэхлэгдсэн энэхүү зочид буудалд хүрэх цорын ганц арга зам нь хад руу авирах явдал юм. Гэсэн хэдий ч ямар нэгэн ууланд авиралтын гойд туршлага шаардлагагүй бөгөөд эрүүл мэндийн асуудалгүй, өндрөөс айдаггүй байхад л хангалттай. Капсул бүр нь хувийн угаалгын өрөөтэй бөгөөд нар мандахад шилэн хоргоноос орчин тойрноо бүтнээр нь харах боломжтой аж.
- Цөл дэх баянбүрд
Тубо зочид буудал нь Колумбын хоёр дахь том цөл, тод ододтой тэнгэрээрээ алдартай Татакаогоос ердөө 10 минутын зайд оршдог. Аялагчид Татакаогийн байгалийн өвөрмөц тогтоцтой газруудаар зочилсныхоо дараа энэхүү бяцхан, агааржуулагчтай өрөөнүүдээс сонгон өдрийн ядаргаагаа тайлдаг. Нийт 37 капсул өрөөтэй бөгөөд эдгээр нь дотроо хоёр хүний зайтай, бетон хоолойгоор хийгджээ.
- Байгальтай уусах уу?
Канадын Ванкувер арал дээрх зул сарын гацуур шиг шилмүүст моддын дунд өлгөгдсөн амралтын газар нь нойрсож буй шувуудын дунд халхавч дотор хөвж байгаа мэт мэдрэмж төрүүлдэг. Анхны бөмбөрцөг буудал нь 25 жилийн өмнө эко аялал жуулчлалыг хөгжүүлэх, Канадын ой моддын онгон байдлыг хадгалах хүсэл эрмэлзэлд тулгуурлан бүтээгджээ. Өрөөнүүдээс гараад мөн сүүдрэвчтэй цэцэрлэг, уушийн газар, ресторан байдаг.
- Унтахын өмнөх уншлагын цаг
Хятадын зүүн нутгийн Жэжян мужид байдаг уламжлалт модон фермийн байшин 2019 онд капсул зочид буудал, номын дэлгүүр, олон нийтийн номын сан болон дахин нээгджээ. Хулсаар хийсэн номын тавиуриудын хооронд нуугдсан нэг орны хэмжээтэй жижиг тасалгаанд 20 хүн унтах багтаамжтай. Энэхүү алслагдсан барилгын шалнаас тааз хүртэлх тунгалаг хавтангууд нь шөнийн цагаар сүм хийд мэт гэрэлтэж, тойрон хүрээлэх уулархаг байгаль тодорч үзэгддэг байна.
Эх сурвалж – https://www.bbc.com/travel/article/20240820-eight-of-the-worlds-most-extraordinary-tiny-hotel-rooms
Бэлтгэсэн дадлагажигч оюутан Э.Номин
