Телеграмын босс, үүсгэн байгуулагч Павел Дуровыг мессеж программ дахь зохион байгуулалттай гэмт хэргийн мөрдөн байцаалтын хүрээнд Францад албан ёсны мөрдөн байцаалтад оруулсан гэж Парисын прокурор мэдэгдлээ. Тэрбээр Орос гаралтай тэрбумтан ч Францын иргэншилтэй юм. 39 настай Дуровыг цагдан хориогүй ч шүүхийн хяналтад байгаа бөгөөд таван сая еврогийн (4,2 сая фунт стерлинг; 5,6 сая доллар) барьцаа төлж батлан даалтад гарах ёстой гэжээ.
Дуровыг өнгөрсөн бямба гаригт Парисын хойд хэсэгт байрлах Ле Бурже нисэх онгоцны буудалд ирэхэд нь уг програмтай холбоотой гэмт хэргийн үндэслэлээр саатуулж, долоо хоногт хоёр удаа цагдаагийн газарт өөрийн биеэр ирэх мөн тухайн нутаг дэвсгэрээс гарахыг нь хориглосон байна.
Парисын прокурорын газраас лхагва гарагт хийсэн мэдэгдэлдээ прокурорууд Дуровыг дараахь гэмт хэрэгт холбогдуулан албан ёсны мөрдөн байцаалтад хамруулсан гэж мэдэгджээ.
– Зохион байгуулалттай бүлэглэлийн хууль бус гүйлгээг идэвхжүүлэхийн тулд онлайн платформыг удирдахад хамтран оролцох
– Эрх баригчидтай харилцахаас татгалзах
– Хүүхдийн бэлгийн мөлжлөгт хамаарах зургийг гэмт хэргийн зохион байгуулалттайгаар тараахад оролцсон гэх гурван үндэслэлээр шалгаж байгаа аж.
Францад албан ёсны мөрдөн байцаалтад орох нь гэм буруутай гэсэн үг биш. Эсвэл шүүх хуралдаанд хүргэх албагүй боловч шүүгчид мөрдөн байцаалт явуулахад хангалттай хэрэг байгаа гэж үзэж байгаа юм.
Дуров сүүлийн үеийн үйл явдлын талаар олон нийтэд ямар ч тайлбар хийгээгүй байна.
Түүний өмгөөлөгч Давид-Оливье Камински хэлэхдээ Телеграм нь Европын дижитал зохицуулалтыг бүх талаараа дагаж мөрддөг бөгөөд бусад нийгмийн сүлжээнүүдийн адил стандартад нийцдэг гэжээ.
Эх сурвалж: BBC
