“Хайр ба Байгаль” нүүдэлчин регги фестивалийг ирэх амралтын өдөр зохион байгуулах гэж байна. Үүнтэй холбоотой UB DUB клубийн хамт олон мэдээлэл хүргэлээ. Тэд “нүүдэлчин бол Монгол гэдэг хүний хамгийн том тодорхойлолт. Нүүдэлчин хүмүүсийн сэтгэлгээ бол байгалиа хайрлах хүндлэхээс эхлэлтэй. Монголчууд уул усаа тахиж, тэнгэртээ залбирч, байгалиа шүтдэг улс. UB DUB клубийн гишүүд бид энэ бүхний үргэлжлэл юм. Бид бол хөгжимд хайртай, соёлдоо хайртай хүмүүсийн нэгдэл. Дэлхий дээр маш олон хөгжмийн төрөл байдгаас бид Регги хөгжимд хайртай болсон шалтгаан бол Jamaica үндэстэн,Монгол үндэстний хоорондын сэтгэлгээ болон соёлын адил төстэй талууд бидэнд ихээр нөлөөлсөн. Мөн үүнээс гадна бидэнд одоогийн Монголын нийгэмд хайр маш дутагдаж буй мэт санагддаг. Харин тэр хайрыг бид регги хөгжмөөс олж авсан. Гагцхүү энэ мэдэрсэн хайрыг бид нүүдэлчин соёлтой энэ улсад монголын хөгжмийн соёлтойгоо хослуулан модернизаци болгон хүргэхийг хүссэн. Регги хөгжим бол нийгмийн маш том үзэл санааны хөгжим. Бид энэ зүйлээр дамжуулан нэгнээ хайрлах хайр, байгалиа хүндлэн хайрлах хайр хоёрыг нийгэмдээ бий болгох нь энэхүү фестивалийн зорилго. Хүн, байгаль, амьтан, ургамлыг алагчлахгүй хайрлах үзэл бол монгол философийн үндсэн зүйл. Үүнийг jamaica үндэстэнд алагчлахгүй хайр = one love хэмээн үздэг” хэмээв.
Энэ жил хоёр дахь жилдээ зохион байгуулагдах гэж байгаа бөгөөд энэ жилийн онцлог бол олон улсын регги артистууд, тэр тусмаа анхны африкан уран бүтээлч монголд хүрэлцэн ирэх гэж байгаа юм. Мөн бидний 5 жилийн ой тохиож байна.
НААДМЫН ТУХАЙД: Хамгийн анхны фестиваль Улаанбаатар хотын төвд 500 гаруй хүн хүрэлцэн ирсэн бөгөөд 10 уран бүтээлч, 8 цагийн хөтөлбөртэй үргэлжилсэн. Энэ жил хотоос ойрхон байгальд, монгол болон олон улсын 20 орчим уран бүтээлчидтэй 13 цагийн хөтөлбөртэй, үндсэн хоёр тайзтайгаар зохион байгуулагдах гэж байна.
UB DUB клубийн тухайд: 1970-80 аад онуудад Регги хөгжим дэлхийд байлдан дагуулж байх үед Монголын уран бүтээлийн салбарын олон дуунд шингэсэн байдаг. Харин Монголд регги хөгжим анх бие даан хөгжиж эхэлсэн нь 2004 онд Souljahs хамтлаг тэргүүтэй Ratabuzz регги артист гарж ирсэн. Үүнээс хойш регги хөгжим улам хөгжиж Jiijah болон UB DUB CLUB-н үүсгэн байгуулагч Macho нар хүч түрэн гарч ирж ирсэн. Регги хөгжим хөгжихийн хэрээр сонсогч дэмжигчид олон болж 2019 онд албан ёсны UB DUB CLUB нэртэйгээр үйл ажиллагаа суурьтай үйл ажиллагаа эхлүүлж байсан. Үүнээс хойш таван жилийн хугацаанд 40 гаруй регги арга хэмжээ парти, 60 гаруй регги уран бүтээл, Боб Марлигийн албан ёсны киноны нээлт, нэг фестиваль хийж, зохион байгуулсан байна.
Ерөнхий зохион байгуулагч: UBDUBCLUB
Хамтран зохион байгуулагч: EventX
Хаана: Happy Park / White Rock /
Хэзээ: 08 сарын 31, 2024
