Гал сөнөөгчид дэлхийн хамгийн том чийглэг газар болох Бразилийн Пантанал бүс дэх ойн түймэртэй идэвхтэй тэмцсээр байна. Пантанал нь ягуар, аварга шоргоолж, голын халиуны өлгий нутаг гэдгээрээ алдартай.
Харамсалтай нь уг байгалийн онгон бүс нутгийн Мато Гроссо-ду-Сул мужид 32 мянга орчим га талбай аль хэдийн түймэрт өртсөн гэж орон нутгийн хэвлэлүүд мэдээллээ. Энэ жилийн ой хээрийн түймрийн улирал өмнөх жилүүдийнхээс эрт эхэлж, эрчимтэй газар авч байгааг цаг уурын мэргэжилтнүүд ч анхааруулсан. Мөн гал сөнөөгчид хүчтэй салхи шуурга нь галыг унтраах ажлыг түргэн шуурхай, үр дүнтэй явагдахад саад учруулж байгааг мэдээллэв. Салхинаас гадна тус бүс нутагт бусад жилүүдийг бодвол бороо бага орсон нь түймрийн тархалтад нэмж нөлөөлжээ.
Бразилийн Сансар Судлалын Үндэсний Хүрээлэнгийн (ССҮХ) тоо баримтаас үзвэл, оны эхнээс зургадугаар сарын 9-ны өдөр хүртэл гарсан түймрийн тоо өнгөрсөн оны мөн үеийнхээс 935 хувиар өссөн байна. Ердийн үед Бразилд ой хээрийн түймрийн улирал долоодугаар сараас эхэлдэг тул зургаадугаар сар гарахад л эхэлсэн энэ өсөлт нутгийн иргэдийн анхаарлыг онцгойлон татжээ.
Мато Гроссо-ду-Сул мужийн эрх баригчид дөрөвдүгээр сард хур тунадас бага байгаа нь ой хээрийн түймэр эрт эхлэх бүх нөхцлийг бүрдүүлж байна гэж үзэж байгаль орчны онц байдал зарласан. Уг таамаглал биеллээ олж 2024 онд гарсан гал түймрийн тоо 2020 оноос хойших хамгийн өндөр нь буюу Пантанал бүсийн хувьд түүхэн дэх хамгийн хэцүү жил болжээ.
Мужийн захиргаа найм, есдүгээр саруудад цаг агаар улам хуурайшиж, гал түймрийн байдал үүнээс ч дордох магадлалтайг анхааруулав. Түүнчлэн өнгөрсөн долоо хоногт Бразилийн холбооны засгийн газар ой хээрийн түймэртэй тэмцэхийн тулд Мато Гроссо-ду-Сул муж болон Амазон бүс нутгийн засаг захиргаатай хамтран ажиллахаа мэдэгдсэн юм.
Эх сурвалж – https://www.bbc.com/news/articles/crgg7rnlrylo
Бэлтгэсэн дадлагажигч оюутан Э.Номин