АНУ-ын Миссури мужийн Сэйнт Луис хотноо байрлах World Chess Hall of Fame дэлхийн томоохон шатрын музейн сан хөмрөгт монгол шатрыг залсан байна.
Тодруулбал, “Khaan Chess” брэндийг хөгжүүлж яваа хамт олон “Нөхөрлөл” сэдэвт их гарын шатраа тус музейн санд бэлэглэсэн байна. Шатар бэлэглэх ёслолыг “Америкийн цом” шатрын супер мастеруудын тэмцээний нээлтийн үеэр гуравдугаар сарын 11-ний өдөр зохион байгуулж, тэмцээний нээлтийн хонхыг цохижээ. Тус тэмцээнд дэлхийн шатрын 10 гаруй их мастер оролцож байгаа аж.
“World Chess Hall of Fame буюу “Дэлхийн шатрын алдрын танхим” нь шатрын сэдэвт дэлхийн томоохон музейн нэг бөгөөд олон оронд үйлдвэрлэсэн төрөл бүрийн ур хийцтэй шатрын арвин үзмэртэй зэрэгцээ дэлхийн болон АНУ-ын шилдэг шатарчдын алдрыг мөнхөлсөн танхимтай.
Эх сурвалж: Монгол Улсаас АНУ-ын Чикаго хотод суугаа Консулын газар
