Өнгөрсөн өдрүүдэд Ази тивийн улс төрийн намуудын Олон улсын бага хурал Монгол улсад зохион байгуулагдаж 12 орны 18 намын 800 гаруй залуус “Залуусын улс төрд тийм гэж хэлцгээе” уриан дор чууллаа.
Энэ үеэр Ази тивийн 52 орны 352 намын залуусыг нэгтгэсэн ICAPP залуучуудын байгууллагын Ерөнхийлөгч Н.Учралтай хамтарч ажиллах Дэд ерөнхийлөгчөөр Турк, Камбож, Ардчилсан Балба, Пакистан зэрэг улсын Парламент, Засгийн газрын гишүүд сонгогджээ. Мөн хурлын үеэр болсон бас нэг онцлох зүйл нь “Улаанбаатар тунхаг”-ийг баталсан явдал байлаа.
Улаанбаатар тунхагын хувьд Ази тивийн залуус аль нэг нам гэж нэгнээ харалгүй, улс эх орны хөгжилд хамтран ажиллах, улс төрд эзлэх залуусын байр суурийг нэмэгдүүлэхэд нэгнээ дэмжин ажиллах гол зорилготой. Хуралд оролцсон Ардчилсан нам, ХҮН нам болон гадаадын бусад 18 улс төрийн намын залуус 100 хувь дэмжсэн юм.
