Стандарт гэдэг нь аливаа үйл ажиллагаа эсвэл бараа, бүтээгдэхүүний чанар, үзүүлэлт, шаардлагыг зохих журмын дагуу хамаарал бүхий ашиг сонирхолтой талууд зөвшилцөн боловсруулж эрх бүхий байгууллагаар хянаж батлуулсан хэм хэмжээг илэрхийлсэн бичиг баримт юм. Өөрөөр илэрхийлбэл аливаа бүтээгдэхүүн, үйлчилгээ, үйл ажиллагааны хангавал зохих наад захын хэм хэмжээг тогтоох нь стандарт юм. Аливаа стандартыг шинжлэх ухааны дэвшил, техник технологийн хөгжил, практикийн ололт амжилтанд тулгуурлан боловсруулахаас гадна олон улсад хэдийнэ туршигдаж батлагдсан стандартуудыг иш татах цаашлаад үндэсний стандарт болгох байдлаар тухайн улс орнууд өөрсдийн онцлогт тохируулж боловсруулж нэвтрүүлдэг.
Манай улсын хувьд Засгийн газрын тохируулагч агентлаг “Стандарт хэмжил зүйн газар” улсын хэмжээнд үндэсний болон олон улсын стандартуудыг мэдээлэх, арга зүйн зөвлөгөө өгөх, стандартыг батлаж бүртгэх, аливаа салбар, үйл ажиллагааг стандартаар хангах зэрэг цогц үйл ажиллагааг хариуцан хэрэгжүүлдэг эрх бүхий байгууллага юм. Монгол улсын хэмжээнд хэрэгжиж буй болон хүчингүй болсон, шинэчлэн өөрчилсөн бүх стандартуудын мэдээллийг www.estandart.mn сайтаас бүрэн эхээр үзэж танилцах боломжтой.
Монгол Улсын Стандарт нь МNS гэсэн товчилсон тэмдэглэгээгээр эхэлдэг ба арын тоо нь бүртгэлийн дугаар болон баталсан оныг илтгэдэг. Мөн MNS ISO гэж тэмдэглэж стандарчилсан байдаг ба энэ нь Олон улсын стантартын байгууллагын баталсан стандартыг үндэсний стандартад ашилаж болохыг илтгэж тэмдэглэдэг.
Стандартууд нь үндэсний, олон улсын, бүс нутгийн, байгууллагын гэсэн төрлүүдэд хуваагддаг.
Жишээлбэл: ISO-International Organization for Standardization, IEC-International Electrotechnical Commission, EN-European Standards гэх мэт олон улсын болон бүс нутгийн гишүүн орнуудын хүрээнд зөвшилцөн боловсруулдаг.
Үндэсний стандарт нь тухайн улс орон бүр өөрийн онцлогт тохируулан боловсруулж мөрддөг бичиг баримт юм.
Жишээлбэл: Монгол улс-MNS, БНСУ-KS, ОХУ-ГОСТ, БНХАУ-GB, Япон улс-JIS, Австрали-ANSI гэх мэт үндэснийхээ хэмжээнд мөрддөг стандарттай байдаг..
Байгууллагын стандарт нь үндэсний стандартад тусгагдаагүй хэм хэмжээг илүү нарийвчилан зааж боловсруулсан бичиг баримтыг хэлдэг.
Стандарт нь нийгэм, эдийн засгийн үйл ажиллагаа болох аливаа үйлдвэрлэл, худалдаа, үйлчилгээ гэх мэт харилцааг илүү цэгцтэй, нэгдмэл байлгах, аюулгүй ажиллагаатай холбоотой асуудлыг шийдвэрлэхэд гол үндэс болдог. Улс орон болон байгууллага, хувь хүний нийгэм, эдийн засгийн хүрээнд тулгардаг бүх процесс, үйл ажиллагааг зохистой түвшинд журамлан, үр ашгийг сайжруулах, бүтээмжийг нэмэгдүүлэх, эрүүл мэнд, хөдөлмөрийн аюулгүй байдлыг хангахад маш том хувь нэмэр болдог.
– https://estandard.gov.mn/mongol-ulsiin-standartiin…/v/393#
Монгол улсын нийт стандартын жагсаалт
– https://estandard.gov.mn/mongol-ulsiin-standartiin…/v/391
2022 онд шинэчлэн баталсан стандартын жагсаалт
– https://estandard.gov.mn/mongol-ulsiin-standartiin…/v/287
2022 онд хүчингүй болгосон стандартын жагсаалт