Мал тооллогын 2022 оны улсын хэмжээний дүнгээр 305.1 мянган малчин мал аж ахуйн үйлдвэрлэлд ажилладаг. Малчдын тоог нийт ажиллагчидтай харьцуулахад ажил эрхэлдэг дөрвөн хүн тутмын нэг буюу 25.8 хувь нь малчид байна. Улсын хэмжээнд 2022 оны эцэст 941.6 мянган өрх бүртгэгдсэний 26.4 хувь нь малтай өрх ажээ. Малчдын дотор 15-34 насны залуу малчдын эзлэх хувийн жин 1.1 хувиар буурч, харин 35-59 хүртэлх насныхны эзлэх хувийн жин 0.7 хувиар, 60-аас дээш тэтгэврийн насныхны эзлэх хувийн жин 0.4 хувиар өсчээ. 2022 оны байдлаар нийт малчдын 95.7 хувь нь буюу 291.8 мянган малчин гар утас хэрэглэдэг. Мөн нийт малчдын 46.4 хувь нь буюу 141.7 мянган малчин интернэт хэрэглэж байгаа нь өмнөх оноос 32.9 мянгаар өссөн үзүүлэлт ажээ.
