Хөдөлмөр, нийгмийн хамгааллын яам, НҮБ-ын Хүн амын сан, Швейцарын хөгжлийн агентлагтай хамтран хэрэгжүүлж буй “Жендерт суурилсан хүчирхийлэлтэй тэмцэх нь” төслийн хүрээнд нийслэлийн Чингэлтэй дүүргийн Гэр бүл, хүүхэд, залуучуудын хөгжлийн хэлтсийн дэргэд зөвхөн эрэгтэй хүмүүст сэтгэл зүйн зөвлөгөө, үйлчилгээ үзүүлдэг “Бид хамтдаа” жишиг төв энэ сарын 15-ны өдөр нээлтээ хийжээ. Эрчүүдийн сэтгэлзүйн эрүүл мэндэд анхаардаг нэг ч гэсэн төв нээгдсэн нь баярлууштай. Гэвч сошиал дээр Монголын анхны эрчүүдэд зориулсан гэх мэт гарчиг бүхий сүржин мэдээ мэдээлэл цацсан ч үйл ажиллагаагаа нь яг хүний төлөө гэсэн байв уу?
Энэхүү төв нь биечлэн болон утсаар хууль эрх зүй, нийгэм-сэтгэл зүйн зөвлөгөө, мэдээллийг мэргэжлийн нийгмийн ажилтан, сэтгэл зүйч ажлын найман цагаар өгөх зэрэг болно гэсэн мэдээллийг Гэр бүл, хүүхэд, залуучуудын хөгжлийн газар, Чингэлтэй дүүргийн Гэр бүл хүүхэд залуучуудын хөгжлийн хэлтэс гэсэн сошиал хуудсандаа мэдээлэл оруулсан байсан юм. Гэвч тэдний утсаар зөвлөгөө мэдээлэл авах #77066084 гэсэн дугаарын орох ярианы эрх хаагдсан байв.
Үүнийг тодруулахаар Чингэлтэй дүүргийн Гэр бүл, хүүхэд залуучуудын хөгжлийн хэлтсийн вэб сайт дээрх 9800-0560 гэсэн албаны дугаараас тодруулах гэсэн ч мөн тэжээлээс салсан гэсэн автомат хариулагчтай тулав. Энэ мэт ажиллахгүй дугааруудаар иргэдийг төөрөлдүүлж, орхих нь төрийн ажил төвөгтэй, удаан гэдэг муу нэр салахгүй байхаас өөр яах билээ.
“Тус жишиг төвийн үйл ажиллагааг төр, төрийн бус байгууллагын түншлэлийн хүрээнд төрийн бус байгууллагаар гэрээлэн гүйцэтгүүлж байгаа бөгөөд цаашид эрэгтэйчүүдийн чиглэлээр үйл ажиллагаа явуулдаг үндэсний сүлжээ үүсгэж ажиллана” гэсэн том амбицтай байгаа ч үнэнхүү хэрэг дээрээ ийм л байдалтай байлаа.
