Өнгөрсөн оны байдлаар унадаг дугуйтай холбоотой 89 осол гарч байсан бол он гарсаар нийт 16 ослын тохиолдол бүртгэгджээ. Түүнчлэн гэр хороолол, хотхон дотор автомашинд мөргүүлэх тохиолдлын тоо нэмэгдсэн байна. Хүүхэд эцэг эх, асран хамгаалагчийн хараа хяналтгүйгээр замын хөдөлгөөнд оролцох, гарцгүй хэсгээр дугуйтай явах, зорчих хэсгийг голлож оролцох зэрэг шалтгааны улмаас хүүхдүүд машинд мөргүүлж цаашлаад амь насанд нь аюул учирч буйг Тээврийн цагдаагийн албанаас мэдээллээ.
Энэ талаар Тээврийн цагдаагийн албаны хэвлэл мэдээллийн ажилтан Т.Отгонтамир “Замын хөдөлгөөний тухай дүрэмд зааснаар 0-10 хүртэлх насны хүүхэд, аюулгүй газар эцэг эх, асран хамгаалагчийн хамтаар унадаг дугуй, скүүтер, рольктой зорчих боломжтой. 10-14 насны хүүхэд унадаг дугуйн замаар асран хамгаалагчийн хамтаар явж болно. Харин 14-нөөс дээш насны хүүхэд унадаг дугуйн зам байхгүй тохиолдолд зорчих хэсгийн баруун талаар явах ёстой юм. Саадыг тойрохоос бусад тохиолдолд зүүн тал руу шилжихийг хориглоно хэмээн заасан байдаг. Гэхдээ хүүхдүүд ихэвчлэн явган хүний гарц, уулзвараар унадаг дугуйгаар зорчдог. Дүрэмд зааснаар гарц гарамтай хэсгээр явахдаа дугуйнаасаа бууж баруун гар талдаа түрж алхах ёстой” гэлээ.
