БОАЖЯ-ны захиалгаар Азийн хөгжлийн банкны санхүүжилтээр хэрэгжүүлж буй “Тогтвортой аялал жуулчлалыг хөгжүүлэх төсөл”-ийн хүрээнд Хөвсгөл аймгийн байгалийн цогцолбор газарт баригдаж буй замын ажилтай БОАЖ-ын Сайд Б.Бат-Эрдэнэ болон холбогдох албаны хүмүүс танилцлаа.
Уг төсөл нь:
•Хатгалын төв замыг Хатгал-Жанхай-Тойлогт чиглэлийн авто замтай холбох хоёр км хатуу хучилттай авто зам барих;
•Хатгал-Жанхай-Тойлогт чиглэлийн 30.4 км хатуу хучилттай авто зам барих;
•Хатгал-Хүзүүвчийн шил-Ашихай чиглэлийн 5.5 км хатуу хучилттай авто зам барих
•Хатгал орчмын долоон байршилд авто зогсоол барих;
•Хөвсгөл нуурын байгалийн цогцолборт газарт хоёр чиглэлд явган болон морин аяллын жим тохижуулах 5 ажлаас бүрдэх юм.
Тус ажлын 2022 оны гүйцэтгэл 75 хувьтай байгаа ба 2023 оны долдугаар сард Хатгал – Жанхай – Тойлогт чиглэлийн хоёр км, Хатгал- Хүзүүвчийн шил – Ашихай чиглэлийн 5,5 км замыг ашиглалтад оруулна гэдгийг төслийн гүйцэтгэгч хэлэв. Үлдсэн хэсэг нь энэ онд багтаж ашиглалтад оруулах юм.
ЗАМЫН АЖИЛД 5,5 КМ ГЕО ТОРЛОГ ХЯЗГААРЛАГЧ, ГЕО НЭХМЭЛ АШИГЛАЖ БАЙНА
Тус технологи нь цэвдгийн тогтвортой байдлыг хангах ба замын чанарын стандартад гурван жилийн баталгаа өгөх юм. Уг ажлыг ЭС АР ПИ инженер консалтинг Монголиа гүйцэтгэж бна.
Хөвсгөл нуурын эрэг орчмын цэвдгийг хамгаалах технологийн шийдэл бүхий автозамыг ашиглалтад оруулснаар Хөвсгөл нуурын эрэг орчмын тоосжилтыг бууруулах, жуулчдын тав тухтай зорчих боломжийг бүрдүүлэх, аялал жуулчлалаас оруулах эдийн засгийн үр өгөөж нэмэгдүүлэхэд өндөр ач холбогдолтой юм.