Цаг уурын байгууллагын ирүүлсэн мэдээгээр энэ сарын 11-ний өдрийн байдлаар нийт нутгийн 25 хувь нь цастай байгаа бөгөөд дундаж цасны зузаан нь 8 см байна. Тухайлбал, Увс нуур, Тэс гол, Булган, Шишхэд, Халх голын сав газруудын 65-85 хувь нь цастай байгаа бол цасан дахь усны нөөц 0.31 шоо.км байгаа юм. Мөн Хяргас нуур, Завхан, Дэлгэрмөрөн, Идэр, Хар нуур, Ховд, Үенч, Бодонч, Хөвсгөл нуур, Эг зэрэг голуудын савын 20-40 хувь нь цастай байгаа талаар Онцгой байдлын ерөнхий газраас мэдээллээ.
Урин дулаан цаг ирж байгаатай холбогдуулан голуудын саваар шар усны үер буух нөхцөл бүрдэх тул дараах зөвлөмжийг хүргэж байна.
Үүнд:
- Том жижиг гол, сайр жалгын эрэг хөвөөнөөс зайдуу суурьших,
- Гуу жалга, далан , шуудууг цэвэрлэж ус урсахад чөлөөтэй болгох,
- Амьтны сэг зэмээр цасны ус дамжин гол руу орж ус бохирдуулах өвчин эмгэг тараах аюултай тул зохих арга хэмжээг цаг алдалгүй авч цэвэрлэгээ устгал хийж, шар усны үерийн аюулаас урьдчилан сэргийлэхийг зөвлөв.
