Британи Улсын “East Surrey College”-ийн математикийн багш Б.Эрдэнэчимэг нь хөдөө, орон нутгийн сургуулийн сурагчдын англи хэлний мэдлэгийг сайжруулахад дэмжлэг үзүүлэх зорилгоор “MC Children’s Books” ном хандивлах аяныг АНУ, Англид ажиллаж, амьдарч буй монгол иргэдийн дунд санаачлан зохион байгуулж байна.
Тэрээр анх 2020-2022 онд “21 аймаг тус бүрд 1000 ном” уриан дор дэлхийн өнцөг булан бүрд ажиллаж амьдарч буй монголчууд болон англи, америк иргэдтэй хамтран нийт 32 мянга гаруй англи ном, DVD, сургалтыг дэмжих тоглоом цуглуулж, Монголын 21 аймгийн дунд сургуулиудад хандивласан байна.
Энэ оноос эхлэн “330 сум бүрд 150 ном” уриан дор хөдөөгийн сум бүрд 150 ширхэг англи ном хандивлах аяныг эхлүүлээд байна.
Монгол Улсаас ИБУИНХУ-д суугаа ЭСЯ-ны зүгээс энэхүү санаачилгыг дэмжиж, өөрийн төрсөн сумандаа ном хандивлах ажлыг хариуцан зохион байгуулах, ном хандивлах, санхүүгийн дэмжлэг үзүүлэх хүсэлтэй хүмүүсийг өргөнөөр оролцохыг уриалжээ.
Энэ асуудлаар тус ЭСЯ-ны [email protected], Б.Эрдэнэчимэгийн [email protected] хаягаар холбогдох боломжтой.
Б.Эрдэнэчимэг ном хандивлахаас гадна хөдөөгийн хүүхдүүдэд англи хэл заах ажлыг 2022 оны зун эхлүүлсэн бөгөөд нийслэлийн ерөнхий боловсролын 1 дүгээр сургууль дээр хөдөө, орон нутгийн хүүхдүүдэд зориулсан англи хэлний сургалтыг өөрийн зардлаар зохион байгуулан Британиас англи хэлний багш нарыг урьж ажиллуулжээ.
