Ерээд оныхны бага нас ер бусын гэгээлэг, нандин дурсамжаар баялаг санагддаг. Зуугийн ундааны зургийг харах төдийд амтагдаж, цэнхэр диско печенийн сүүтэй үнэрийг хүртэл саяхан мэт санаж байх жишээний. Цоглог хөтөлбөр, Хит, Гэрэлтэй цонх тэргүүтэй нэвтрүүлэг бидний хорвоотой танилцах гүүр байлаа. Тэр дундаа багаасаа хип хоп урсгалд дуртай байсан сэтгүүлч миний хувьд Хит нэвтрүүлэг хүлээж, хорхойсч үздэг бүтээл байв …
Хит нэвтрүүлгийн үүсгэн байгуулагч, хөтлөгч Д.Давааням агсныг мэдэхгүй хүн ховор биз. Урлагт хайртай, дуртай хүн бүр түүнийг хамгийн сайнаар санан дурсдаг. Түүний хорь гаруй жилийн хөдөлмөр зүтгэл монголын урлагийн хөгжлийг өнөөгийн түвшинд хүргэхэд даацтай хувь нэмэр оруулжээ. Гадна дотнын уран бүтээлчдийг нэвт шувт мэдэхийн зэрэгцээ олон нийтэд таниулдаг, мөр зэрэгцсэн нөхдөө өмөөрдөг. Айл бүрд цэнхэр дэлгэцээр дамжуулан халуун дулаан энерги, эрч хүч дамжуулдаг байсан Хит нэвтрүүлгийн дугаар бүр цагаан мөртэй. Тиймдээ ч түүнийг хөгжмийн ертөнцийн нэвтэрхий толь хэмээн одоо цагийн рок поп ертөнцийн одод дуу нэгтэй хүлээн зөвшөөрдөг. Энэ бол магтаал биш. Урлаг хэмээх өнөр айлд тодоор бичигдэн үлдсэн жинхэнэ түүх билээ.
Өнгөрсөн үеийн товчийг энэ хүртэл сийрүүлэн бичсэн нь учиртай. Түүхийг зөвхөн дурсан санах биш үргэлжлүүлж бүтээдгийн илрэлийг бид ирэх ням гарагт харах гэж байна. Өөрөөр хэлбэл тэртээ 2004онд Монголд анх удаа “Хит”-ийн Давка санаачлан зохион байгуулж байсан хип хоп авардсыг хүү Даваадорж дахин олны хүртээл болгохоор зорьж явна. Аавынхаа бүтээж үлдээсэн үнэ цэнийг үргэлжлүүлэн, хорин жилийн дараа өөр түвшинд авчирч буй хэрэг л дээ. Урлаг соёлын ертөнцөд ч томоохон үйл явдал. Хип хоп урсгалын хөгжилд ч шинэ хуудас болсон арга хэмжээ болох нь тодорхой болов.
Тэр чаджээ. Үргэлжлүүлэх ёстой зүйлийнхээ үзүүрээс лав атгаж, зоригтой эхлүүлж чаджээ.
Хэвлэл мэдээллийн хэрэгсэлд яриа өгөхдөө үе үе хоолой нь зангирч, хаа нэг тэвчилгүй нулимсаа үзүүлж, ил далдаар санасан сэтгэлээ уудалдаг түүний хувьд мөрөөдөл нь биелэх шиг. Тэнгэрт одсон аавтайгаа уулзаад золгох шиг. Аавынхаа өмнө бардам ёслох шиг сэтгэл нь дүүрэх биз ээ. Үргэлжлэл байхын утга учрыг түүнээс харж огшив, би.
Сэтгэл тэнийх шиг сайхан үйл явдлын гэрч болох нь ээ, Triple X HIT Awards. Тун удахгүй Steppe Arena цэнгэлдэхэд уулзацгаая. Хип хоп үүрд ...