Манай Монголчууд нэг үеэ бодвол өглөөний цай бидэнд хэр зэрэг чухал болох талаар хангалттай сайн мэдлэг мэдээлэлтэй болсон. Гэвч өглөөний цай уухдаа юуг хэр хэмжээтэй тохируулан хэрэглэх нь таны бие организмд эерэгээр болон эсрэгээр нөлөөлөх вэ гэдэг тал дээр тэр бүр сайн мэддэггүй. Тэгвэл бид танд дараах зөвлөгөөг хүргэж байна.
Өглөө цадталаа идэх
Маш олон хүмүүс энэ дээр алддаг. Өглөө маш сайн, бүр тултлаа идээд гарах ёстой гэж боддог. Энэ бол буруу ойлголт. Их идэх тусам бидний цусны сахар өсөж, буурах үедээ огцом буурч бие организмыг буцаад нойрмог байдалд хүргэдэг.
Дээрээс нь сэрж амжаагүй ходоодон дээр баахан хоол чихвэл ходоод гэнэт ажиллаж гэдэс доторт хүндрэл учруулж болзошгүй байдаг аж. Аливааг ер нь тохируулан хэрэглэх нь өөрөө эм юм.
Өглөө жимс идэх
Өглөөг Европ хоолны (жимс) маягаар эхэлж Европ маягаар (жимс) дуусгах нь тийм ч зөв хооллолт биш аж.
Яагаад гэвэл жимс ногоо нь калори, өөх тос, уураг агуулах хэмжээ нь маш бага зэрэгтэй бөгөөд нүүрс усыг ихээр агуулдаг. Энэ нь таныг хангалттай цатгалан байлгахгүй бөгөөд мөн байгалын сахар ихтэй жимс нь цусны сахарыг огцом ихэсгэх магадлалтай.
Эхлээд кофе, дараа нь иднэ
Зарим хүмүүст өглөө кофегүй бол нойрноосоо сэргэхэд хэцүү байдаг. Тиймээс өглөө босоод л шууд кофе уудаг. Иймэрхүү зуршилтай хүмүүс миний эргэн тойронд ч бий. Өглөө хүний ходоод гэлтгүй бие бүхэлдээ нойрмог байдаг ба энэ үед нь сэрээд шууд өлөн ходоодон дээр хүчтэй каффейнтэй зүйл уух нь ходоодыг цочроодог.
Тиймээс эрүүл мэндээ бодсон ч тэр аяга бүлээн ус уусныхаа араас кофе болон дараагийн зүйлсээ идэж, ууж занших хэрэгтэй.
