Таны нэг удаа өгсөн цус гурван хүний амь насыг аврах боломжтой байдаг гэдгийг та олон удаа сонсож байсан байх. Гэсэн ч яаж ямар шалгуураар цусаа хандивлахаа мэддэггүй бол “Цус сэлбэлт судлалын үндэсний төв” – өөс дараах зөвлөмжийг хүргэж байна.
Цусны донор болохын тулд 17-60 насны, 45 килограмаас дээш биеийн жинтэй, ямар нэгэн харшлах өвчин эмгэггүй, харьцангүй эрүүл байх шаардлагатай байдаг байна. Насанд хүрсэн хүнд дунджаар 4-5 литр цус байдаг.
Эрэгтэйчүүд хоёр сар тутам, эмэгтэйчүүд гурван сар тутам цусаа өгч болдог. Эрүүл хүн нэг удаад 350-400 мл цус өгч болох ба жилд дөрвөн удаа цусаа өгөхөд ямар ч аюулгүй байдаг аж. Таны өгсөн цусыг төрөхийн хүндрэл, гэмтлийн цус алдалт, томоохон хагалгааны үед болон хорт хавдар, цусны эмгэгийн үед хэрэглэдэг байна.